Վրաստանը կորոնավիրուսի հետևանքով ազգային տնտեսության համար կորուստների մինիմիզացման ծրագիր է մշակում
Վրաստանի իշխանությունները եւ բանկային հատվածը կորոնավիրուսի հետեւանքով ազգային տնտեսության համար կորուստների մինիմիզացման ծրագիր են մշակում, հայտնում է News-Georgia- ն:
Ըստ Bloomberg-ի, նոր կորոնավիրուսի համաճարակի պատճառով համաշխարհային տնտեսությունը կարող է մինչեւ 2.7 տրիլիոն դոլար կորցնել, ինչը համարժեք է Մեծ Բրիտանիայի ՀՆԱ-ին: Վրաստանում առաջիններից հարվածը զգացել է տուրիստական ու հյուրանոցային բիզնեսը: Դեռ փետրվարին միջազգային այցելությունների թիվը նվազել էր 0.7 տոկոսով: Զբոսաշրջության ազգային վարչակազմում նախազգուշացրել են, որ մարտին իրավիճակը կվատթարանա:
«Արդեն պայմանավորվածություն է ձեռք բերվել հարկաբյուջետային խթանմանն ուղղված միջոցառումների, ինչպես նաեւ առավել կարիքավոր հատվածների համար որոշակի հարկային արտոնությունների ներդրման ուղղությամբ»,- հայտնել են կառավարության վարչակազմում` Վրաստանի վարչապետ Գեորգի Գախարիայի եւ տնտեսական թիմի եւ բանկային ոլորտի ներկայացուցիչների հանդիպումից հետո:
Կողմերը համաձայնել են, որ ինչպես պետական, այնպես էլ մասնավոր հատվածը առավելագույն կերպով կօգտագործեն առկա գործիքները` բիզնեսի վրա հնարավոր բացասական ազդեցությունը նվազագույնի հասցնելու համար:
«Բանկային հատվածը կոորդինացված ձեւով համագործակցելու պատրաստակամություն է հայտնել»,- նշվում է տեղեկատվության մեջ: Վրաստանի կառավարությունը խոստանում է առաջիկայում հայտարարել համաձայնեցված ծրագրի կոնկրետ դրույթների մասին:
Բացի այդ, Վրաստանի երկու խոշոր առեւտրային բանկերը` TBC Bank-ը եւ Bank of Georgia-ն, սպառողներին վարկերի մարման ժամկետների երկարաձգումներ կտրամադրեն` կորոնավիրուսի տնտեսական հետեւանքները մեղմելու համար:
Աննախադեպ արտոնությունների մասին TBC Bank-ը ու Bank of Georgia-ն հայտարարել են վարչապետի հետ աշխատանքային հանդիպումից հետո: Առեւտրային բանկերը, իշխանությունների հետ միասին, կորոնավիրուսի տարածման պայմաններում տնտեսությունը խթանելու միջոցներ են մշակում:
Այսօր Վրաստանում կորոնավիրուսի հաստատված դեպքերի թիվը 25-ն է: Կորոնավիրուսով վարակված հիվանդների վիճակն, ընդհանուր առմամբ, կայուն է, նրանցից միայն չորսի վիճակն է գնահատվում որպես «ուշադրություն պահանջող»:
Որպես կորոնավիրուսի տարածումը կանխելու միջոցառումների մաս` Վրաստանի կառավարությունը չեղյալ է հայտարարել զանգվածային միջոցառումների մեծ մասը, պետական գերատեսչություններն անցում են հեռակա աշխատանքային ռեժիմի, արձակուրդներ են հայտարարվել բոլոր ուսումնական հաստատություններում` դպրոցներում, համալսարաններում եւ մանկապարտեզներում: Թատրոններն ու թանգարանները փակ են այցելուների համար, սպորտային միջոցառումները եւս չեղարկվել են:
Վրաստանը դադարեցրել է օդային հաղորդակցությունն Իրանի, Չինաստանի եւ Իտալիայի հետ: Կառավարության որոշմամբ` պարտադիր կարանտին է սահմանվել Իտալիայից, Հարավային Կորեայից, Իրանից, Չինաստանից, Ֆրանսիայից, Գերմանիայից, Ավստրիայից ու Իսպանիայից ժամանած քաղաքացիների համար: