Բորիս Ջոնսոն. Կքննարկենք Մեծ Բրիտանիայում մարզական մրցաշարերը դադարեցնելու հարցը

Մեծ Բրիտանիայի վարչապետ Բորիս Ջոնսոնը հայտարարել է, որ իր գլխավորած կառավարությունը այսօր՝ մարտի 13-ին, կքննարկի երկրում բոլոր տեսակի մարզական մրցաշարերը դադարեցնելու հարցը:

«Միկել Արտետայի՝ կորոնավիրուսով վարակված լինելու մասին լուրը ստանալուց անմիջապես հետո որոշում ընդունեցինք առավոտյան քննարկել Մեծ Բրիտանիայում բոլոր տեսակի սպորտային մրցաշարերը դադարեցնելու հարցը:

Առողջությունն առաջին տեղում է, և մենք իրավունք չունենք թույլ տալ, որ մեր սխալները մարդկային կյանքեր արժենան»,- Բորիս Ջոնսոնի խոսքը փոխանցում է The Sun-ը:

Ավելի վաղ «Լեսթերի» գլխավոր մարզիչ Բրենդան Ռոջերսը հայտարարել էր, որ իր թիմի 3 ֆուտբոլիստ մեկուսացվել է կորոնավիրուսով վարակված լինելու կասկածով:

Մեկուսացվել է նաև «Մանչեսթեր Սիթիի» ֆրանսիացի պաշտպան Բենժամին Մենդին:

Իտալական «Յուվենտուսի» կենտրոնական պաշտպան Դանիելե Ռուգանիի և «Սամպդորիայի» հարձակվող Մանոլո Գաբիադինիի կորոնավիրուսի թեստերը դրական պատասխան էին տվել:

Առողջապահության համաշխարհային կազմակերպությունը մարտի 11-ին կորոնավիրուսը՝ COVID-19-ը հայտարարեց որպես համաշխարհային համաճարակ: Աշխարհի 118 երկրում վիրուսով վարակված է ավելի քան 124 հազար մարդ: Զոհերի թիվը մոտենում է 5 հազարին: