«Խոսում եք դատական իշխանության անկախությունից, հետո ասում եք՝ պետք է մաքրեիք համակարգը. ո՞նց մաքրեինք». Բադասյան
Ազգային ժողովում «Դատական օրենսգիրք» սահմանադրական օրենքում փոփոխություններ կատարելու և կից ներկայացված օրենքների նախագծերի փաթեթը հնարավորություն է տալիս արդյունավետ պայքար մղել կոռուպցիայի դեմ դատական համակարգում, միաժամանակ չխաթարելով դատական իշխանության անկախությունը: Այս մասին, այսօր՝ մարտի 4-ին, ԱԺ-ում հիշյալ նախագծի քննարկման ժամանակ նշեց արդարադատության նախարար Ռուստամ Բադասյանն իր եզրափակիչ ելույթում:
Անդրադառնալով «Լուսավոր Հայաստան» խմբակցության ղեկավար Էդմոն Մարուքյանի և նույն խմբակցության պատգամավոր Տարոն Սիմոնյանի այն դիտարկմանը, թե այս նախագծով ստեղծում են կախյալ դատական համակարգ, նախարարը հարց ուղղեց. «Ո՞ր մարմնից է կախյալ լինելու դատական համակարգը, Էթիկայի և կարգապահական հարցերի հանձնաժողովի՞ց, որտեղ բացարձակ մեծամասնությունը դատավորներ են, նաև ԲԴԽ-ի՞ց, որտեղ 5 դատավոր անդամ կա եւ 5 իրավաբան գիտնական եւ սահմանադրական մարմին է, ուսումնական հարցերի հանձնաժողովի՞ց, որտեղ գերակշիռ մեծամասնությունը կրկին դատավորներ են, գնահատման հանձնաժողովի՞ց, որտեղ դատավորներ ենք ընդգրկված: Էլ ոնց է կախյալ, ումից է կախյալ լինելու:
Պարոն Սիմոնյան, ասում եք՝ պահը բաց եք թողել: Ենթադրենք էդպես է, բա որ պահը բաց ենք թողել, ես հիմա ի՞նչ նախագիծ բերեմ: Բերեմ բաց թողած պահի նախագի՞ծը:
Կամ ասում եք՝ կարող էր ավելի կոշտ լինել նախագիծը. Պետք էր մաքրել համակարգը, հետո նոր... ո՞նց մաքրենք, ում մաքրենք: Համ խոսում եք դատական իշխանության անկախությունից, համ խոսում եք դատավորների արժանապատվությունից, հետո ասում եք՝ պետք է մաքրեիք: Ո՞նց մաքրեինք»,-ասաց Բադասյանը:
Նա դիմեց ընդդիմադիր պատգամավորներին եւ անկախ պատգամավոր Արման Բաբաջանյանին՝ նշելով. «Առաջինից երկրորդ ընթերցման ժամանակ բերեք այն տարբերակը, որն ավելի խիստ է, լուծում է դատական համակարգի առաջ ծառացած խնդիրները, մենք անպայման կընդունենք, բայց մի պայման կա՝ Սահմանադրությանը հակասող չպետք է լինի: Բերեք մաքրելու լավ տարբերակ, մենք ընդունենք, շարժվենք առաջ»:
Նախարարը նկատեց, որ այս օրինագծով հետադարձ ուժի մասին խոսք լինել չի կարող. «Բայց 2017-ի հուլիսի 1-ից Քրեական օրենսգրքում երկու հոդված է ուժի մեջ մտել, որը ենթադրում է, որ այդ տարիների հայտարարագրերը վերլուծելիս Կոռուպցիայի կանխարգելման հանձնաժողովը կարող էհասանելիություն ունենալ ֆինանսական տվյալներին»: