Դեղեր փոստո՞վ. Համապատասխան օրինագծի քննարկում է եղել ԱԺ-ում
Դեղերի դեֆիցիտ ունեցող Հայաստանի քաղաքացիները հնարավորություն կստանան դրանք ստանալ արտասահմանից փոստային փոխանցմամբ: Այս մասին մարտի 3-ին ԱԺ նիստում «Դեղերի մասին» օրենքում փոփոխություններ եւ լրացումներ կատարելու մասին օրինագծի քննարկման ժամանակ ասաց օրինագծի հեղինակ, իշխող «Իմ քայլը» դաշինքի պատգամավոր Սիսակ Գաբրիելյանը:
Պատգամավորի խոսքով՝ ներկայումս գործող կարգավորումների համաձայն՝ ֆիզիկական անձինք իրավունք ունեն հանրապետության տարածք ներկրել անձնական օգտագործման դեղամիջոցներ: Մասնավորապես, թույլ է տրվում ներկրել 3 տուփերով 10 անուն դեղամիջոցներ: «Սակայն այս իրավունքը չի տարածվում փոստային փոխանցումների վրա, եւ հաճախ ֆիզիկական անձանց համար անհրաժեշտ փոստով ստացվող դեղամիջոցները ոչնչացվում են Պետեկամուտների կոմիտեի աշխատակիցների կողմից»,- պարզաբանեց Գաբրիելյանը:
Հիմա նաեւ թույլ է տրվում ամեն ամիս իրականացնել երեք տուփով երեք անուն դեղորայքի փոխանցում: Դեղամիջոցների ընդհանուր ծավալը չպետք է գերազանցի 3 տուփը: Բայց հիվանդի համար դեղամիջոցների ավելի մեծ ծավալի անհրաժեշտության մասին բժշկի եզրակացության առկայության դեպքում առավելագույն չափը կարող է մեծացվել:
ՊԵԿ-ն իր հերթին պետք է վարի ստացվող միջոցների վիճակագրություն՝ կոռուպցիոն դրսեւորումների բացառման եւ օրենքով հաստատված ծավալների պահպանման նպատակով: Փոստով դեղեր ստանալու կարգը որոշելու է Հայաստանի կառավարությունը:
Չնայած օրենսդրական նախաձեռնության հեղինակի բոլոր փաստարկներին, Գաբրիելյանին, սակայն, չհաջողվեց «Լուսավոր Հայաստանից» եւ «Բարգավաճ Հայաստանից» իր գործընկերներին, ինչպես նաեւ իշխող «Իմ քայլը» դաշինքի որոշ պատգամավորների համոզել: Պատգամավորները, մասնավորապես, մտահոգություն հայտնեցին այն կապակցությամբ, որ փոստով կսկսեն երկիր ներկրել արգելված դեղամիջոցներ, որոնք հնարավոր կլինի գործածել որպես թմրամիջոց: «Դուք այդպես մեր երկրում թմրամոլների թվի մեծացման սպառնալիք կստեղծեք»,- հայտարարեց «Բարգավաճ Հայաստանից» պատգամավոր Սերգեյ Բագրատյանը: Ընդ որում՝ նա նշեց, որ որոշ դեղամիջոցներ տալիս են բուժող բժշկի ներկայացրած տեղեկանքի առկայությամբ: Սրա հետ կապված խորհրդարանականը հարց տվեց՝ այս դեպքում իշխանություններն ինչպե՞ս են պատրաստվում իրավիճակը կարգավորել: