Գերմանացի փորձագետը նախազգուշացրել է, որ դիմակը չի փրկի կորոնավիրուսից
Գերմանիայի Ռոբերտ Կոխի անվան ինստիտուտի ղեկավար, պրոֆեսոր Լոթար Վիլերը հայտարարել է, որ դիմակներ կրելն իմաստ ունի միայն նրանց, ովքեր արդեն վարակվել են կորոնավիրուսով, և ոչ թե նրանց, ովքեր զգուշանում են վարակից:
«Եթե դուք հիվանդացել եք և դիմակ եք կրում, ապա հազի կամ փռշտոցի դեպքում վիրուսը չի կարող հեռու տարածվել, դա հասկանալի է»,- ասել է նա Բեռլինում կայացած մամուլի ասուլիսում: Սակայն, ըստ պրոֆեսորի, «ապացույց չկա», որ դիմակի ամենօրյա օգտագործումն օգնում է խուսափել կորոնավիրուսով վարակից:
Նաև շատ կարևոր է ձեռքերը հնարավորինս հաճախ լվանալը, ընդգծել է Վիլերը: «Մենք գիտենք, որ այս վիրուսը տարածվում է օդակաթիլային ճանապարհով, այսինքն՝ եթե ինչ-որ մեկը փռշտում կամ հազում է, և ձեռքով կամ թաշկինակով փակում է, դա օգնում է՝ անկախ նրանից, թե որքան պարզունակ է դա հնչում: Եթե դրանից հետո մարդը սեղմում է ինչ-որ մեկի ձեռքը, ապա վարակը կարող է փոխանցվել, ուստի շատ կարևոր է ձեռքերը հաճախակի լվանալը»,- ասել է նա:
Վիլերը վիրուսի հետ կապված իրավիճակն անվանել է «շատ դինամիկ», որի դեպքում հիվանդությունը կարող է արագ տարածվել: Ըստ նրա, հիվանդանալու դեպքում հարկավոր է տանը մնալ և հեռախոսով տեղեկացնել բժշկին:
Ըստ ինստիտուտի տվյալների, Գերմանիայում հաստատվել է վարակի 10 դեպք. դրանք գրանցվել են Բավարիայում, Հյուսիսային Ռեյն-Վեստֆալիայում և Բադեն-Վյուրթեմբերգում:
Ռոբերտ Կոխի ինստիտուտը վարակիչ հիվանդությունների ուսումնասիրման դաշնային ինստիտուտ է Գերմանիայում:
Ավելի վաղ փետրվարին Հիվանդությունների վերահսկման և կանխարգելման չինական կենտրոնի (CCDC) մասնագետները կորոնավիրուսի իրենց ուսումնասիրության մեջ նշել են, որ ձեռքերը լվանալը և բժշկական դիմակներ կրելը շատ կարևոր են նոր վարակի տարածման դեմ պայքարի գործում: