«Սա բազմաթիվ նախագծերի նոր սկիզբ կդառնա». ՀՀ ԱԺ Ղրղզստան-Հայաստան պատգամավորական բարեկամական խմբի այցը Բիշքեկ

2020թ․ փետրվարի 28-ին Ղրղզստանի Հանրապետության Ժոգորկու Քենեշի Ղրղզստան-Հայաստան պատգամավորական բարեկամական խմբի ղեկավար Ժանարբեկ Ակաեւի հրավերով Բիշքեկում էր գտնվում Հայաստանի Հանրապետության Ազգային ժողովի Տարածաշրջանային եւ եվրասիական ինտեգրման հարցերի մշտական հանձնաժողովի նախագահ, Հայաստան-Ղրղզստան բարեկամական խմբի ղեկավար Միքայել Մելքումյանի գլխավորած պատվիրակությունը։ Պատվիրակության կազմում էին ՀՀ ԱԺ պատգամավորներ Ալեքսեյ Սանդիկովը, Սարիկ Մինասյանը եւ Արամ Խաչատրյանը։ Հանդիպմանը ներկա էր նաեւ Ղազախստանի Հանրապետությունում Հայաստանի Հանրապետության արտակարգ եւ լիազոր դեսպան Գագիկ Ղալաչյանը։ Պատվիրակությանն ընդունեց Ղրղզստանի Հանրապետության Ժոգորկու Քենեշի նախագահի տեղակալ Աիդա Կասիմալիեւան։

Նիստի սկզբում ողջունելով հայկական պատվիրակությանը՝ Ժոգորկու Քենեշի նախագահի տեղակալ Աիդա Կասիմալիեւան ընգծեց, որ վերոնշյալ հանդիպումը բազմաթիվ նախագծերի նոր սկիզբ կդառնա եւ նոր որակ կհաղորդի հայ-ղրղզական միջխորհրդարանական հարաբերություններին։ Տեղեկացնելով, որ կարեւորում են բարեփոխումները սոցիալական, գենդերային, առողջապահության ոլորտներում, նա նաեւ նշեց, որ 2020թ․ Ժոգորկու Քենեշի նոր կազմում նախատեսված է 30% քվոտա կանանց համար։

Միքայել Մելքումյանը շնորհակալություն հայտնեց ջերմ ընդունելության համար, ներկայացրեց գործընկերներին՝ նշելով, որ այս այցը բարեկամական խմբերի ձեւաչափով առաջինն է։ Իր խոսքում պարոն Մելքումյանն առաջարկեց մանրամասն ուսումնասիրել համագործակցության բոլոր ուղիները, մասնավորապես՝ առողջապահության, սոցիալական, հումանիտար ոլորտներում: Նա կարեւորեց տեղեկատվական տեխնոլոգիաների, գիտության, զբոսաշրջության, գյուղատնտեսության, առողջապահության եւ հումանիտար ոլորտներում համագործակցության ընդլայնումը, հավելեց, որ Հայաստանում հաջողությամբ գործում են ՏՏ կենտրոններ։ Միքայել Մելքումյանը նշեց, որ 2018թ․ թավշյա հեղափոխությունից հետո Հայաստանում հաջողությամբ է ընթանում կոռուպցիայի դեմ պայքարը, ինչպես նաեւ առանձին ընկերություններին տրվում են բիզնես արտոնություններ, պետության կողմից առանձնակի ուշադրության կենտրոնում են գտնվում գյուղատնտեսության ոլորտի ծրագրերը։

Նա նաեւ ներկայացրեց գործընկերներին, որ տարածաշրջանում Հայաստանը միակ երկիրն է, որն ունի ատոմային էլեկտրակայան։

Նշվեցին ոսկերչության ոլորտում փոխգործակցության զարգացման հնարավոր հեռանկարները ։ Երկու երկրների տնտեսական համագործակցության համատեքստում պարոն Մելքումյանն առաջարկեց կազմակերպել բիզնես համաժողովներ, որտեղ հնարավոր կլինի առարկայական քննարկել տնտեսական ոլորտում համագործակցության հեռանկարները։

Իր խոսքում նա կարեւորեց նաեւ միջազգային խորհրդարանական հարթակներում պատվիրակությունների համագործակցությունը։

Ժոգորկու Քենեշի Ղրղզստան-Հայաստան բարեկամական պատգամավորական խմբի անդամ Աալի Կարաշեւը կարեւորեց այն փաստը, որ երկու երկրներն իրենց համագործակցությունն ընդլայնելու համար շատ ընդհանուր ոլորտներ ունեն։ Նա մասնավորապես նշեց, որ Հայաստանն ունի զգալի հաջողված փորձ լեռնաարդյունաբերական ոլորտում, ինչպես նաեւ առաջարկեց հնարավոր համագործակցության զարգացում զբոսաշրջության ոլորտում։

Կարաշեւն ընդգծեց նաեւ տարբեր միջազգային հարթակներում խորհրդարանական պատվիրակությունների համագործակցության կարեւորությունը։

Պարոն Մելքումյանը գոհունակությամբ նշեց, որ ՀՀ ԱԺ առաջիկա նստաշրջանում կվավերացվի Հայաստանի եւ Ղրղզստանի միջեւ երկակի հարկումը բացառելու մասին համաձայնագիրը, ինչը եւս կնպաստի երկու երկրների տնտեսությունների զարգացմանը։

Միքայել Մելքումյանն անդրադարձավ նաեւ Եվրասիական տնտեսական միության շրջանակներում համագործակցության համատեքստում թե՛ Հայաստանի, եւ թե՛ Ղրղզստանի համար արտոնություններ ունեցող ապրանքների ժամկետների երկարաձգման անհրաժեշտության հարցին ։

Զրույցի ընթացքում անդրադառնալով Հայաստանի արտաքին քաղաքականության կարեւորագույն հիմնահարցերին՝ բարեկամական խմբի ղեկավար Միքայել Մելքումյանը կարեւորեց Լեռնային Ղարաբաղի հակամարտության կարգավորումը բացառապես խաղաղ ճանապարհով, ինչպես նաեւ Հայոց Ցեղասպանության ընդունումը միջազգային հանրության կողմից։

Ղրղզստանի Հանրապետության Ժոգորկու Քենեշի նախագահի տեղակալ Աիդա Կասիմալիեւան ընդգծեց, որ ղրղզական կողմը եւս կողմնակից է հակամարտությունների միմիայն խաղաղ կարգավորմանը։

Հանդիպման ընթացքում խորհրդարանականները քննարկեցին նաեւ փոխադարձ հետաքրքրություն ներկայացնող այլ հարցեր։

Նույն օրը Հայաստանի Հանրապետության Ազգային ժողովի Տարածաշրջանային եւ եվրասիական ինտեգրման հարցերի մշտական հանձնաժողովի նախագահ Միքայել Մելքումյանի գլխավորած պատվիրակությունը հանդիպեց Ղրղզստանում բնակվող հայ համայնքի ներկայացուցիչների հետ, ծանոթացավ հայրենակիցների գործունեությանը։