Երեխայի աչքի առաջ հայրը կացնահարում էր մորը. վկան պատմել է՝ ինչպես է փեսան կացնահարել իր կնոջն ու աղջկան

Երևանի ընդհանուր իրավասության Շենգավիթի նստավայրում երեկ՝ փետրվարի 13-ին, ընթանում էր նախկին կնոջը, զոքանչին կացնահարած Վլադիկ Մարտիրոսյանի գործի դատական նիստը, որին ճառով հանդես եկավ մեղադրող կողմը։ Խոսեց նաև գործով վկան, որը ամբաստանյալի աներն էր.

«Ինչի էն ժամանակ չէր մտածում իր երեխայի առողջության մասին։ Էն ժամանակ ասում էր՝ իմ ազգանունը չդնեք, ոչ էլ ծննդական էր հանել։ Երախյի ծնունդին չկար, ո՞ւր էիր, մկան ծա՞կն էիր մտել։ Նա մեզ այնքան սպառնալիքներ է հնչեցրել, իսկ ոստիկանությունը ոչինչ չի ձեռնարկել»։

Նա պատմեց, նաեւ դեպքից. «Հասել եմ տուն, մուտքի մոտ տեսնեմ աղջիկս շքամուտքի առաջ արնաշաղաղ պառկած է, ու ինքն էլ կացնահարում է կնոջս՝ իմ աչքի առաջ։ Ձեռնափայտով մտել եմ կռվի մեջ։ Եթե հարեւանները չհասնեին նա ինձ կսպաներ։ Ես այդ վիճակով ահազանգել եմ ոստիկանություն։ Երեխայի աչքի առաջ, դուք պատկերացնո՞ւմ եք, նա գոռում ա՝ մամա, մամա. ու ինքը հա՞յր է կոչվում»։

Նշենք, որ դատաքննությունը հասնում է ավարտին, այս նիստին հնչեցին մեղադրող կողմի ճառերը, հաջորդ դատական նիստը նշանակվեց ապրիլի 3-ին։ Մյուս դատական նիստին հնչելու են պաշտպանական կողմի ճառերը։

Նշենք, որ Վլադիկ Մարտիրոսի Մարտիրոսյանին մեղադրանք է առաջադրվել նախկին կնոջ` Թագուհի Մանսուրյանի, վերջինիս ծնողներ Կարինե եւ Վաչագան Մանսուրյանների հետ ունենալով անբարյացկամ փոխհարաբերություններ, 2016թ. հուլիսի 8-ին ժամը 01:00-ի սահմաններում, Երեւան քաղաքի Ս.Տարոնցի նրբանցքի 7-րդ շենքի բակում իր մանկահասակ երեխային` 31.10.2015թ. ծնված Նորայր Մարտիրոսյանին տեսակցելու հարցի շուրջ հերթական անգամ վերջիններիս հետ վիճաբանելուց հետո, երբ Թագուհի եւ Կարինե Մանսուրյանները գնացել են ոստիկանության Շենգավիթի բաժին, համոզված լինելով, որ նրանք վերադառնալու են տուն, երեխային տեսակցելն արգելելու պատճառով նրանցից վրեժխնդիր լինելու շարժառիթով, ապօրինաբար կյանքից զրկելու դիտավորությամբ, իր հետ նախապես վերցրած կացնով դարանակալել է հիշյալ շենքի շքամուտքում եւ երբ նույն օրը ժամը 04:30-ի սահմաններում Թագուհի եւ Կարինե Մանսուրյանները մտել են Երեւան քաղաքի Ս.Տարոնցի նրբանցքի 7-րդ շենքի մուտք եւ բարձրացել առաջին հարկում գտնվող իրենց տան ուղղությամբ, շքամուտքում, նրանց համար անսպասելի հետեւի կողմից հարձակվել է Թագուհի եւ Կարինե Մանսուրյանների վրա, նախ` կացնով բազմաթիվ հարվածներ է հասցրել Թագուհի Մանսուրյանի մարմնի տարբեր մասերին` պատճառելով կյանքին վտանգ սպառնացող ծանր վնաս, ապա` նույն կացնով, ապօրինաբար կյանքից զրկելու դիտավորությամբ, բազմաթիվ հարվածներ է հասցրել շքամուտքից դեպի 2-րդ հարկ տանող աստիճաններին կանգնած Կարինե Մանսուրյանի գլխին եւ մարմնի տարբեր մասերին` պատճառելով կյանքի հետ անհամատեղելի մարմնական վնասվածքներ` ապօրինաբար կյանքից զրկելով նրան:

Այնուհետեւ, նույն կացնով, ապօրինաբար կյանքից զրկելու հանկարծակի ծագած դիտավորությամբ, բազմաթիվ հարվածներ է հասցրել Թագուհի եւ Կարինե Մանսուրյանների օգնության կանչի ձայներից տանից դուրս եկած Վաչագան Մանսուրյանի գլխին, ուսին, ձեռքերին` պատճառելով կյանքին վտանգ սպառնացող ծանր վնաս, սակայն իր կամքից անկախ հանգամանքներում Վաչագան Մանսուրյանին ապօրինաբար կյանքից զրկելուն ուղղված գործողություններն ավարտին չի հասցրել, քանի որ աղմուկի ձայներից հարեւանությամբ բնակվող Սարգիս Գրիգորյանը դուրս է եկել բնակարանից եւ գործուն միջոցներ ձեռնարկելով` հետեւի կողմից փաթաթվելով` Վ.Մարտիրոսյանին հեռացրել է Մանսուրյաններից, խոչընդոտել եւ կանխել է Վ.Մարտիրոսյանի հանցավոր մտադրության վերջնական իրականացումը:

Բացի այդ, Վլադիկ Մարտիրոսյանը, 2016թ. հունիսի 3-ին, ժամը 10:30-ի սահմաններում ՀՀ ԱՆ ԴԱՀԿ ծառայության վարչական շենքում իր երեխային տեսակցելու հարցի շուրջ վիճաբանել է նախկին կնոջ` Թագուհի Մանսուրյանի հետ, որի ընթացքում սպառնացել է, որ կսպանի, կվերացնի նրան, իսկ երեխան երկու տարեկանը չի բոլորի, այդ սպառնալիքներն իրականացնելու իրական վտանգ է եղել: