«10 տոննայանոց բեռնատարը գալիս է, 25 կգ-ներով ներմուծում են Հայաստան». կսկսեն ստուգել նաև սահմանը հատելու հաճախությունը
Կառավարությունն իր այսօրվա՝ փետրվարի 13-ի նիստում որոշում կայացրեց փոփոխություններ կատարել առանց մաքսատուրքերի ներմուծվող ապրանքների սահմանաչափերում:
ԿԵՊ նախագահ Դավիթ Անանյանը նշեց, որ 2015-ին կայացվել էր որոշումը, որը կարգավորում էր ՀՀ տարածք ներմուծվող ապրանքների սահմանաչափերը, որոնց գերազանցման դեպքում՝ գերազանցված չափերի համար ավելացված արժեքի հարկ էր հաշվարկվում:
Նա հիշեցրեց, որ այդ չափը 25 կգ-ից դարձավ 50 կգ, որը բացասական ազդեցություն ունեցավ շուկայի վրա. «Մասնավորապես մեր քաղաքացիները փորձեցին ուղեկցող բեռների անվան տակ ներմուծել ակնհայտ բիզնես մտադրությամբ ներմուծվող ապրանքներ: Շատ տնտեսվարողների իրենց ապրանքների ներմուծման ժամանակ մինչեւ սահմանը հատելը ֆիզիկական անձանց ուղղորդում էին, որ նրանք 50 կգ-ներով այդ ապրանքը ներմուծեն որպես ուղեկցող բեռ: Սա ներքին շուկայի համար շատ մեծ ցնցումներ առաջացրեց եւ մեծ մտորումների տեղիք տվեց:
2018-ի նոյեմբերի 1-ին փոփոխվեց եւ սահմանաչափը նորից 50 կգ-ից իջավ 25 կգ-ի: 2019-ի հունվարի 1-ից իմպերատիվ սկսեցինք կիրառել դա մաքսատուրքերի գանձման համար»,-ասաց Անանյանը:
Նա ընդգծեց, որ այսօր ընդունվող որոշման նպատակն է ներքին տեղեկատվության ուսումնասիրության արդյունքում վեր հանված ռիսկերի հիման վրա որոշ ապրանքների համար այնպիսի սահմանաչափեր սահմանել, որոնք ակնհայտորեն սեփական օգտագործծման համար բավական նորմալ սահմանաչափեր են, սակայն բիզնեսի համար չեն կարող դիտվել որպես շահեկան:
«Օրինակ միս եւ մսային որոշ ենթամթերքների համար սահմանված է 30 կգ, մենք իջեցնում ենք 25 կգ-ի: Ձկներ, խեցգետնանմաններ, կակղամորթներ ներմուծելիս սահմանաչափը 30 կգ-ից նվազեցնում ենք 25 կգ-ի: Կաթնամթերք, թռչնի ձու, բնական մեղր ապրանքների համար եւս սահմանաչափը 30-ից դարձնում ենք 25 կգ: Սուրճ ու թեյ ներմուծելու համար սահմանաչափը 15 կգ-ից դարձնում ենք 10 կգ»,-ասաց ՊԵԿ նախագահը՝ հավելելով, որ փոփոխությունների հմնական նպատակը ստվերային տնտեսության դեմ պայքարն է:
Փոխվարչապետ Տիգրան Ավինյանը նշեց. «Ես տեղեկացված եմ, որ սա բիզնես է դարձել, որ անհատապես ավտոմեքենաներով մարդիկ կան, որ աշխատում են այս ուղղությամբ, եւ հիմա չափաքանակները նվազեցնելով, ուղղակի ավելի շատ մարդ է ներգրավվելու պրոցեսի մեջ»: նա հարց ուղղեց, թե հատկապես որ ապրանքատեսակների դեպքում՝ է այդ մեխանիզմը ֆործում:
Դավիթ Անանյանը պատասխանեց, որ այդպիսի ապրանքները շատ են. «Օրինակ միրգը, փամփերսները, բժշկական պարագաներ, ներարկիչներ: Պատկերացրեք, որ 10 տոննա տարողությամբ բեռնատարը գալիս է եւ բեռնաթափվելուց հետո նախկինում 50 կլիոգրամներով, հիմա 25 կիլոգրամներով փորձ է կատարվում ներմուծել Հայաստան:
Այս փոփոխությունը այն դեղատոմսը չէ, որ լրիվ կարգավորելու է այս հարցը: Դրա համար նախորդ տարվա հոկտեմբերին սահմանեցինք այնպիսի նորմ, որով ՊԵԿ նախագահին իրավասություն տվեց գաղտնի պրոֆիլներ սահմանել, որով կարող ենք կարգավորել հաճախականությունների հարցը:
Ներկայումս սահմանափակում չկա, թե նույն անձը քանի անգամ կարող է 50 կամ 25 կգ բեռ ուղեկցել Հայաստան: Մենք անձի նկատմամբ սահմանելու ենք ամսական հաճախականությունների քանակ եւ իրականացնելու ենք հսկողություն»,-հայտարարեց ՊԵԿ նախագահը: