Դպրոցների տնօրենների «Օղակ» օպերացիան էր կազմակերպվել․ ավագանու անդամի հարցը՝ քաղաքապետին
Շենգավիթ վարչական շրջանի շենքում 21 մանկապարտեզի տնօրենների ստորացման ակտ է կազմակերպվել։ Այս մասին այսօր՝ փետրվարի 11-ին, Երևանի ավագանու նիստին ասաց «Բարգավաճ Հայաստան» խմբակցության անդամ Հռիփսիմե Առաքելյանը։
«Շենգավիթ վարչական շրջանների 21 մանկապարտեզների տնօրենները հրավիրվել են վարչական շրջանի շենք և այնտեղ «Օղակ» օպերացիան է կազմակերպվել։ Այսպես դետեկտիվ ժանրում մանկապարտեզի տնօրենների ստորացման ակտ է կազմակերպվել։ Դրա արդյունքում և մարդկանց անմեղության կանխավարկածի խնդիրներ առաջացան, հատկապես այս մարդկանցից որևէ մեկը քրեական գործով չի անցնում, այդ պարագայում «միլիցա» բերել տնօրենների վրա չգիտեմ բարոյական և իրավական և բոլոր կողմերով անընկալելի է։ Ձեր թիմում շատերը ողջունեցին՝ բռնել երեխաների հաց ուտողներին, այս մարդկանց պարսավանքի ենթարկեցին սոցիալական ցանցերում։ Այո, ես համաձայն եմ, ես չեմ բացառում, որ կարող են այսպիսի դրսևորումներ լինեն մանկապարտեզներում, բայց կան ավելի կարևոր իրավական գործընթացներ»,-ասաց նա։
Քաղաքապետ Հայկ Մարությանն արձագանքեց․ «Խնդիրն այն է, որ պարբերաբար մանկապարտեզներում սննդի հետ կապված ինչ-որ խնդիրներ են առաջանում, բնականաբար վարչական շրջանները փորձում են մաքսիմալը անել, որ մեր երեխաներին հասնի որակյալ սնունդ, ճիշտ չափաբաժիններով, սա գերնպատակն է, իսկ թե ինչպես դա անել, ամեն վարչական շրջանի ղեկավար յուրովի է դա անում։ Կարծում եմ՝ քաղաքապետարանը պետք է սպառի բոլոր միջոցները, այնուհետև դիմել է այլ գերատեսչություններին։ Այստեղ կար մի հանգամանք, որ քաղաքապետարանը այս էքսպերտիզան չէր կարող անել, դրա համար էլ կարծում եմ վարչական շրջանի ղեկավարը դիմել է այլ գերատեսչության»։
Առաքելյանն արձագանքեց․ «Ինձ շատ դուր եկավ մի ձևակերպում՝ «ակնադիտական փորձաքննություն արեցինք», այդ ակնադիտականից բացի եթե կան այլ փաստեր, կարելի է առանձին խոսել, իրավական գործընթաց սկսել, չեմ կարծում, որ 21 մանկապարտեզների տնօրենները սննդի թալանով են զբաղված։ Սրանք խայտառակ մեկնաբանություններ են»։
Բարձրացված հարցին արձագանքեց նաև Շենգավիթի թաղապետ Ռազմիկ Մկրտչյանը․
«Այդ հանդիպումը նախապես պայմանավորված է եղել, որը տեղի է ունեցել վարչական շրջանի վարչական շենքում, կրթության, գիտության և սպորտի բաժնի կողմից, բնավ կապ չուներ այս օրը տեղի ունեցած իրադարձությունների հետ։ Մենք մեր ուսումնասիրությունների արդյունքում հիմնավոր կասկածներ ունեինք մանկապարտեզների գրանցամատայանների վերափոխումների հետ կապված, որի մասին տեղեկացրել ենք ՀՀ ոստիկանությանը, խնդրել մենք ուսումնասիրություն իրականացնել, քանի որ մենք նման գործառույթ չէինք կարող իրականացնել։ Ես բնավ չեմ մտածում, որ մանկապարտեզների տնօրենները հանցագործներ են, ես կարծում եմ, որ պետք է ուսումնասիրություն իրականացնել և իրավական գնահատական տալ։ Մենք հանդիպումն ուղղակիորեն անցկացրել ենք մեր վարչական շենքում, հաշվի առնելով որ ոստիկանության 5 աշխատակիցները պատրաստվել էին մատյաններն վերցնել ուսումնասիրության, ես լիազորված չեմ պատասխանել, թե իրենք ինչու են եկել, այդ ձևաչափով աշխատել»։