Հանրաքվեի կազմակերպման համար կծախսվի մոտ 2,5 – 2,7 մլրդ դրամ. ԿԸՀ

Սահմանադրական փոփոխությունների հանրաքվեի կազմակերպման համար, ինչպես նախորդ ընտրություններում, կծախսվի մոտ 2,5 – 2,7 մլրդ դրամ: Այս մասին փետրվարի 11-ին լրագրողների հետ զրույցում ասաց Կենտրոնական ընտրական հանձնաժողովի նախագահ Տիգրան Մուկուչյանը՝ հավելելով, որ նախորդ անգամ բացվել էր 2010 ընտրական տեղամաս, բայց այս անգամ քանիսը կլինի, առայժմ անհնար է ասել:

Նա նշեց, որ ժամկետը կարճ է, ուստի առայժմ դժվար է ասել՝ խցիկներ կտեղադրվե՞ն, քանի որ դա մեծ ծավալի աշխատանք է ենթադրում: «Բացի հասարակական կազմակերպություններից, որպես դիտորդներ կարող են ներգրավվել նաեւ կուսակցությունների ներկայացուցիչները, ընդ որում՝ ոչ միայն խորհրդարանական»,- շեշտեց Մուկուչյանը:

Ի պատասխան այն հարցին, թե նոր իշխանություններն իրեն վստահո՞ւմ են, եւ ինչպիսի՞ հարաբերություններ ունի վարչապետ Նիկոլ Փաշինյանի հետ, ԿԸՀ նախագահը հայտարարեց, որ մեծ թվով ընտրություններ են անցկացվել, այդ թվում՝ Երեւանի ավագանու արտահերթ ընտրությունները, ինչպես նաեւ 2018 թվականի խորհրդարանական ընտրությունները: «ԿԸՀ-ն կատարում է իր լիազորությունները եւ օրենքի շրջանակում կազմակերպում ընտրությունները»,- հավելեց պաշտոնյան:

Տիգրան Մուկուչյանի պարզաբանմամբ՝ օրենքը չի կարգավորում այն բանի ընդհանուր կարգը, թե ինչպես պայքարեն համացանցում խախտումների դեմ, ուստի յուրաքանչյուր խախտում պետք է անհատական կարգով քննարկվի: «Քարոզչության ընթացքում բոլոր կողմերի համար հավասար հնարավորությունների ապահովման հարցը կարող է արդիական լինել միայն այդ ժամանակահատվածում, իսկ այդ ժամկետից դուրս տեղի ունեցող բոլոր գործընթացները չեն կարող առնչվել նրան, ինչը ԿԸՀ-ն է կարգավորում: Դա վերաբերում է նաեւ հեռուստատեսությունում եթերային հավասար ժամանակ տրամադրելու հարցին, դահլիճների տրամադրմանը եւ այլն»,- ամփոփեց նա:

Հիշեցնենք, որ Հայաստանում ապրիլի 5-ին տեղի է ունենալու սահմանադրական բարեփոխումների հանրաքվե: