Թրամփը խոստացել է ստեղծել աշխարհում «ամենահզոր» միջուկային ուժերը

Ռուսաստանի եւ Չինաստանի հետ սպառազինության վերահսկման պայմանագրերի բացակայությամբ Միացյալ Նահանգները ստեղծելու է աշխարհում «ամենահզոր» միջուկային ուժերը, հայտարարել է ԱՄՆ նախագահ Դոնալդ Թրամփը, փոխանցում է «ՌԻԱ Նովոստի»-ն:

«Հիմա թե՛ Ռուսաստանը, թե՛ Չինաստանը միաժամանակ ցանկանում են մեզ հետ բանակցություններ վարել, որ կանգնեցնեն միջուկային զենքի վրա միլիարդավոր դոլարների խելահեղ ծախսը: Բայց միակ ճանապարհը, քանի դեռ այդ համաձայնագիրը չունենք, միակ բանը, որ կարող եմ անել՝ աշխարհում ամենահզոր միջուկային ուժերի ստեղծումն է»,- ասել է նա նահանգապետների հետ հանդիպմանը:

Ռազմավարական ու հարձակողական սպառազինության հետագա կրճատման եւ սահմանափակման միջոցառումների մասին պայմանագրի (ՌՀՍ-3) գործողության ժամկետը լրանում է 2021 թվականի սկզբին, եւ ԱՄՆ-ն դեռեւս չի կողմնորոշվել՝ մտադի՞ր է արդյոք այն երկարացնել:

ԱՄՆ-ն ավելի վաղ հայտարարել էր, որ Ռուսաստանի հետ պայմանավորվածությունները պետք է ներառեն ոչ միայն այն սպառազինությունը, որի վրա տարածվում է ՌՀՍ-3-ը, այլեւ այլ զենքերը եւ փոխադրման միջոցները, որոնք Ռուսաստանում դեռ միայն մշակվում են, ներառյալ փոքր հզորության միջուկային սարքերը փոխադրման նոր միջոցներով: Պենտագոնի կարծիքով՝ Ռուսաստանում կա մինչեւ 2 հազար միավոր ոչ ռազմավարական միջուկային զենք:

Ռուսաստանի նախագահ Վլադիմիր Պուտինը դեկտեմբերին մամուլի ասուլիսի ժամանակ հայտարարել էր, որ Մոսկվան մինչեւ տարեվերջ պատրաստ է երկարացնել ՌՀՍ-3-ի գործողության ժամկետը: «Բայց մեր բոլոր առաջարկներն առայժմ անպատասխան են մնացել, եւ եթե ՌՀՍ-3 չլինի, ապա աշխարհում ընդհանրապես ոչ մի բան չի լինի, որը կզսպի սպառազինության մրցավազքը: Եվ դա, իմ կարծիքով, վատ է»,- նշել էր ՌԴ նախագահը:

Երկուշաբթի՝ փետրվարի 10-ին, Ռուսաստանի ԱԳ նախարար Սերգեյ Լավրովը հայտարարել էր, որ Մոսկվան պատրաստ է քննարկել ռազմավարական ու հարձակողական սպառազինության կրճատման հաջորդ պայմանագրում իր նոր տեսակի սպառազինության հաշվառումը, բայց այդ դեպքում ԱՄՆ-ն եւ արեւմտյան մյուս երկրները պետք է նույն կերպ վարվեն եւ չզարգացնեն համանման զենքը: