Բիլ Գեյթսը 644 միլիոն դոլար արժողությամբ ջրածնային շարժիչով զբոսանավ է պատվիրել
Ամերիկացի միլիարդատեր, բարերար և Microsoft-ի հիմնադիրը պատվիրել է աշխարհի առաջին ջրածնային շարժիչով ջրածնային սուպերզբոսանավը` 644 միլիոն դոլար արժողությամբ: Զբոսանավում կա լողավազան, ուղղաթիռի համար հարթատեղ, սպա սալոն և մարզադահլիճ:
Գեյթսը հեղուկ ջրածնով աշխատող էկոզբոսանավը պատվիրել էր 2019-ին Մոնակոյում զբոսանավերի ցուցահանդեսից հետո, հայտնում է РБК -ն՝ վկայակոչելով The Guardian-ը:
Հոլանդական Sinot ընկերության 112 մ երկարությամբ շքեղ նավն ունի հինգ տախտակամած, 14 հյուրի ու անձնակազմի 31 անդամի համար սենյակներ: Հիմնական առանձնահատկությունը 28 տոննա քաշով հերմետիկ պահոցն է, որը լցված է մինչեւ -253 ° C սառեցված ջրածնով: Հեղուկ վառելիքը էներգիա է ստեղծում երկու շարժիչի համար ներկառուցված վառելիքային էլեմենտների օգնությամբ, որոնք էներգիա են առաջացնում թթվածնի հետ փոխազդեցության ժամանակ:
Դիզայներ Սանդեր Սայնոտը նշել է, որ Aqua զբոսանավը ստեղծվել է «խորաթափանց, հեռատես նավաստու» համար` հիմնվելով զբոսանավերի կառուցման առաջադեմ տեխնոլոգիաների և նորարարությունների վրա:
Զբոսանավը դժվար թե Բիլ Գեյթսի մոտ հայտնվի մինչև 2024 թվականը: Այնուամենայնիվ, երբ դա վերջապես տեղի ունենա, միլիարդատերը կկարողանա իր էկոնավով ժամում 20 մղոն արագություն բացել եւ առանց լիցքավորման անցնել 3.750 մղոն:
64-ամյա Գեյթսը համարվում է աշխարհի երկրորդ ամենահարուստ մարդը. նրա ունեցվածքը 118 միլիարդ դոլար է գնահատվում: Microsoft-ի հիմնադիրը սիրում է հանգստանալ զբոսանավերի վրա, բայց սովորաբար վարձակալում է դրանք. նրա ունեցվածքի ցանկում զբոսանավ դեռ չկա: