Հունաստանում 12 միլիարդ եվրո չվճարված հարկեր է բացահայտվել
Հունաստանի Անկախ պետական եկամուտների նախարարությունը (AADE) 2016-2019 թվականներին ավելի քան 7.4 հազար խոշոր չափերի հարկերից խուսափելու դեպք և 12 միլիարդ եվրո ընդհանուր գումարի պետությանը պարտքեր չվճարելու մասին փաստեր է հայտնաբերել, հայտնում է «ՌԻԱ Նովոստի»-ն` վկայակոչելով «Նավթեմպորիկի» թերթը:
Մասնավորապես, չորս տարվա ընթացքում հարկային ստուգման ծառայությունում հայտնաբերվել է հարկերից խուսափելու 800-ից ավելի դեպք, որոնք ավելի քան 1.75 միլիարդ եվրո են կազմում: Բոլոր տվյալները փոխանցվել են Հանցագործ գործունեությունից ստացվաց եկամուտների օրինականացման դեմ պայքարի վարչություն, փոխանցում է պարբերականը:
Բացի այդ, նույն ժամանակահատվածում AADE-ն Փողերի լվացման դեմ պայքարի գրասենյակ ավելի քան 6.4 հազար դիմում է ուղարկել` «սև» փողերի լայնածավալ լվացման հավանականության վերաբերյալ լրացուցիչ հետաքննություն անցկացնելու համար: Այս զեկույցները վերաբերում էին 10.4 միլիարդ եվրոյի չափով պետությանը պարտքերի չվճարմանը: Բացի այդ, 2016–2019 թվականների ընթացքում փողերի լվացման համար մեղադրվող ավելի քան 4150 հարկ վճարողի տվյալներ են ուղարկվել իրավասու մարմիններին, ավելացնում է թերթը:
Հունաստանի իշխանությունները հարկերից խուսափելը, կոռուպցիայի եւ նեպոտիզմի հետ միասին, անվանել են 2008-ին սկսված պարտքային ճգնաժամի պատճառներից մեկը: 2010 թվականին Հունաստանի իշխանություններին փոխանցվեց այսպես կոչված «Լագարդի ցուցակը»` HSBC բանկի շվեյցարական մասնաճյուղի ավելի քան 2 հազար հարուստ հույն ավանդատուների անուններով: Ցուցակը հանձնվել է Ֆրանսիայի ֆինանսների նախարարության գործող ղեկավար Քրիստինա Լագարդին, և դրա շուրջ սկանդալը վերջին տարիներին դարձել է խոշորագույններից մեկը Հունաստանում, քանի որ այդ ցուցակից անհետացել էին քաղաքական գործիչների հարազատների անունները:
«Լագարդի ցուցակ»-ը կազմվել է բանկի 24 հազար հաճախորդների տվյալների հիման վրա, որոնք թաքցրել են հարկային եկամուտները Ֆրանսիայում, Իտալիայում, Մեծ Բրիտանիայում և ԱՄՆ-ում: Այս տվյալները գողացել էր HSBC բանկի Ժնևի մասնաճյուղի նախկին ծրագրավորող Էրվե Ֆալչիանին: 2015-ի դեկտեմբերին նա «հարյուր հազարավոր կասկածելի բանկային գործարքների» մասին տվյալները փոխանցեց Հունաստանի կառավարությանը: