Սահմանադրական փոփոխության նախագիծը Վենետիկի հանձնաժողով ուղարկելու հարցը լրացուցիչ քննարկման կարիք ունի. Վլ. Վարդանյան
ՀՀ նախագահը ստորագրել է հրամանագիր եւ նշանակել հանրաքվեի օրը՝ ապրիլի 5-ին. դրանից հետո ԿԸՀ-ն պետք է կազմի ժամանակացույց եւ ըստ դրա պետք է ընթանան այն բոլոր գործընթացները, որոնք անհրաժեշտ են:Այս մասին այսօր՝ փետրվարի 10-ին, ԱԺ-ում լրագրողների հետ զրույցում նշեց ԱԺ պետաիրավական հարցերի հանձնաժողոբվի նախագահ Վլադիմիր Վարդանյանը:
«Պետք է ձեւավորվել «այո»-ի եւ «ոչ»-ի շտաբները, պետք է համապատասխան ժամանակահատվածում սկսվի քարոզարշավը: Քարոզարշավի շրջանակներում պետք է բաշխվեն տրամադրվող եթերների ժամանակները: Պետք է հստակեցվեն բոլոր այն նյուանսները, որոնք կապված են հանձնաժողովների ձեւավորման հետ»,-ասաց նա:
Ինչ վերաբերում է Սահմանադրության մեջ փոփոխությունների նախագիծը Վենետիկի հանձնաժողով ուղարկելուն, նա նշեց. «Այս հարցը լրացուցիչ քննարկման կարիք ունի, բայց դուք գիտեք մեր մոտեցումը, մենք Վենետիկի հանձնաժողովի հետ շատ ակտիվ շարունակելու ենք աշխատել: Ընդամենը օրեր առաջ որոշվեց, որ «Կուսակցությունների մասին» օրենքում փոփոխություններ կատարելու մասին օրինագիծը պետք է ներկայացվի Վենետիկի հանձնաժողովի դատին: Վենետիկի հանձնաժողովի ղեկավարությանը ես հանդիպել են նախանցած շաբաթ Ստարսբուրքում: Քննարկել ենք ձեւավորված սահմանադրական փոփոխությունների հանձնաժողովի կազմը, մոտակա աշխատանքները, նաեւ ակնկալել ենք շարունակական աշխատանք Վենետիկի հանձնաժողովի հետ այս հարցում: Բայց քանի որ կոնկրետ այս նախագիծը վերաբերում է այնպիսի փոփոխության, որի պարագայում Վենետիկի հանձնաժողովի ասելիքը շատ քիչ է, ապա այս հարցի վերաբերյալ վերջնական պատասխան չասեմ: Ես հիմա չեմ բացառում, չեմ էլ հաստատում, որ նախագիծը կուղարկիվի միջազգային փորձաքննության»:
Վլադիմիր Վարդանյանը նկատեց, որ սահմանադրական փոփոխությունների վերաբերյալ կան հարցեր, որոնք պարտադիր չէ ուղարկել Վենետիկի հանձնաժողովի փորձաքննության. «Օրինակ, եթե X պետությունը որոշում է փոփոխություն կատարել իր ազգային օրհներգում կամ մայրաքաղաքը փոփոխել, ինչպես օրինակ Ղազախստանը իր մայրաքաղաքի անվանումը փոխեց: Իմ կարծիքով, այս կարգի նախագծերը պետք չի ուղարկել միջազգային փորձաքննության: Այս հարցի վերաբերյալ լրացուցիչ քննարկումներ են անհրաժեշտ՝ հասկանալու համար, թե ինչպիսին է մոտեցումը»:
Հարցին, թե արդյոք շահարկումների առիթ չի դառնա, եթե նախագիծը չուղարկեն Վենետիկի հանձնաժողով. «Ոչ թե Վենետիկի հանձնաժողովն է կոչ արել սահմանադրական փոփոխությունների նախագիծն ուղարկել իրենց, այլ դա ԵԽԽՎ համազեկուցողների հորդորն է եղել՝ հրատապ կարգով այն քննարկելու համար: Կրկնեմ, որ սա լրացուցիչ քննարկման կարիք ունի եւ դրան կանդրադառնանք ավելի ուշ»: