Սամվել Բաբայանի և մյուսների գործով դատական նիստը հետաձգվեց

Երեւանի ընդհանուր իրավասության դատարանում, այսօր՝ դեկտեմբերի 12-ին, նախագահությամբ դատավոր Գագիկ Պողոսյանի, հետաձգվեց ՊԲ նախկին հրամանատար Սամվել Բաբայանի եւ մյուսների գործով դատական նիստը։ Այս դատական նիստին պետք է հետազոտվեին գործով առկա ապացույցները, քանի որ Սամվել Բաբայանը մեղադրվում է Քրեական օրենսգրքի 38-235-րդ հոդվածի 2-րդ մասով (մի խումբ անձանց կողմից ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը), ապացույցների հետազոտման համար անհրաժեշտ էին հատուկ մասնագետներ եւ տեխնիկաներ։

Մեղադրող դատախազն էլ միջնորդեց նիստը հետաձգել։ Հաջորդ դատական նիստը նշանակվեց փետրվարի 18-ին։ Նշենք, որ Սամվել Բաբայանն իրեն առաջադրված մեղադրանքը չի ընդունում։

Հիշեցնենք, որ առաջին ատյանի դատարանը Սամվել Բաբայանին մեղավոր էր ճանաչել Քրեական օրենսգրքի 38-235-րդ հոդվածի 2-րդ մասով (մի խումբ անձանց կողմից ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) եւ 190-րդ հոդվածի 1-ին մասով (հանցավոր ճանապարհով ստացված գույքն օրինականացնելը՝ փողերի լվացում) եւ դատապարտել 6 տարվա ազատազրկման։ Վերաքննիչը անփոփոխ էր թողել առաջին ատյանի որոշումը, իսկ Վճռաբեկ դատարանը՝ բեկանել այն։