Քենիայում մահացել է ամենախոշոր ժանիքներով հանրահայտ Տիմ փիղը
Քենիայի հարավ-արեւելքում 50 տարեկան հասակում մահացել է Տիմ փիղը, հայտնում է ՌԻԱ Նովոստին՝ հղում կատարելով Քենիայի վայրի բնության պահպանության ծառայությանը (KWS)։
Տիմը Քենիայի հարավում ապրող խոշոր ժանիքներով վերջին փղերից էր Աֆրիկայում։
Ծառայության տվյալներով՝ Ամբոսելի ազգային այգում բնակվող փիղը մահացել է երեքշաբթի վաղ առավոտյան։
Նրա մարմինը կրթական եւ ցուցադրման նպատակով կդրվի Նայրոբիում ազգային թանգարանում։
Nairobi News կայքի տվյալներով՝ հանրահայտ փղի մահը վրա է հասել բնական պատճառներով։
Տեղեկացվում է, որ Տիմի ժանիքներից յուրաքանչյուրը կշռում է 45,4 կգ։
Փղի խոշոր ժանիքները նրան ցանկալի թիրախ էին դարձրել որսագողերի համար։ 2016թ․ նա վիրավորվել էր։ Ինչպես տեղեկացվում է մամուլի հաղորդագրության մեջ, Տիմը մեծ քարով հարված էր ստացել գլխին, իսկ ականջը ծակել էին նետով, որի ծայրը մխրճվել էր ուսի մեջ։
Կայքը նաեւ գրում է, որ 2018թ․ փիղը խրվել էր ճահճի մեջ, որտեղից նրան հանելու համար մի քանի ժամ էր պահանջվել։