Ձմռանը Հայաստանում ավտոմեքենա պետք է վարել միայն ձմեռային անվադողերով և միացված լուսարձակներով. օրինագիծ
Այս օրենսդրական փաթեթի շրջանակներում առաջարկվում է, որպեսզի վարորդները դեկտեմբերի 1-ից մարտի 31-ը հարկարդրական կարգով իրենց ավտոմեքենաները սարքավորեն ձմեռային անվադողերով, ինչպես նաեւ երթևեկության ընթացքում միացնեն մոտակա լուսարձակները: Այս մասին փետրվարի 5-ին Պաշտպանության և անվտանգության հարցերով մշտական խորհրդարանական հանձնաժողովի նիստին «Ճանապարհային երթևեկության անվտանգության ապահովման մասին» օրենքում և հարակից օրենքներում փոփոխություններ կատարելու մասին օրինագծերի փաթեթի քննարկման ժամանակ հայտարարեց «Բարգավաճ Հայաստան» կուսակցության պատգամավոր, փաթեթի հեղինակ Արթուր Դալլաքյանը:
Խորհրդարանականի խոսքով` տրանսպորտի ոլորտում առկա իրավիճակը լուրջ մտահոգություն է առաջացնում, քանի որ ավտովթարների հետեւանքով դժբախտ պատահարների քանակը տարեցտարի աճում է, հատկապես` ձմռանը: «Այս օրենսդրական փոփոխությունների օգնությամբ մենք կփորձենք լուծել անվտանգության խնդիրը, քանի որ ձմռանը որոշ վարորդներ ամառային անվադողեր են օգտագործում և ամենավտանգավորն են հասարակության համար, ինչը, իր հերթին, անուղղելի կորուստների է հանգեցնում»,- շեշտեց Դալլաքյանը:
Օրենսդրական փաթեթը նաև սահմանում է, որ եթե նշված ժամանակահատվածում վարորդները չեն երթեւեկի ձմեռային անվադողերով, ապա նրանց նկատմամբ 15 հազար դրամ տուգանք կկիրառվի, իսկ մեքենան ժամանակավորապես կառգրավվի և կտեղափոխվի հատուկ պահպանվող տարածք: Եթե նշված ժամանակահատվածում վարորդը կտեղաշրժվի առանց մոտակա լուսարձակները միացնելու, ապա նրան 5 հազար դրամ տուգանք կսպառնա:
Պատգամավորը նաեւ մի շարք օրինակներ մեջբերեց միջազգային փորձից, մասնավորապես` Շվեդիայի, Ֆինլանդիայի, Էստոնիայի, Չեխիայի եւ այլն:
Նշենք, որ այս օրենսդրական փաթեթը դրական եզրակացություն է ստացել մշտական խորհրդարանական հանձնաժողովի կողմից: