Բանկից առանձնապես խոշոր չափերով գումար հափշտակելու գործով եւս մեկ մեղադրյալի մասով նախաքննությունն ավարտվել է

ՀՀ ՔԿ ՀԿԳ քննության գլխավոր վարչության ընդհանուր բնույթի եւ ընտրական հանցագործությունների քննության վարչությունում ավարտվել է կազմակերպված խմբի կողմից «ՎՏԲ-Հայաստան Բանկ» ՓԲ ընկերությունից խարդախությամբ առանձնապես խոշոր չափերով գումար հափշտակելու դեպքի առթիվ քննվող քրեական գործով եւս մեկ մեղադրյալի մասով նախաքննությունը:

Ձեռնարկված մեծածավալ քննչական գործողությունների արդյունքում պարզվել են հափշտակության մեխանիզմը, կազմակերպված խմբի անդամներից հինգի ինքնությունը, ովքեր Վրաստանի հանրապետության քաղաքացիներ են:

Մասնավորապես՝ նախաքննության ընթացքում պարզվել է, որ Վրաստանի Հանրապետության՝ հիշյալ քաղաքացիները եւ գործով ինքնությունը չպարզված անձը «ՎՏԲ-Հայաստան Բանկ» ՓԲ ընկերությունից խարդախությամբ առանձնապես խոշոր չափերով գումար հափշտակելու նպատակով ստեղծել են կազմակերպված խումբ եւ կատարել դերաբաշխում:

Ըստ դերաբաշխման՝ կազմակերպված խմբի անդամները 2014թ. նոյեմբերին Վրաստանից ժամանել են Հայաստանի Հանրապետություն, «ՎՏԲ-Հայաստան Բանկ» ՓԲ ընկերությունում իրենց անուններով հաշվեհամարներ բացել, ստացել բանկային քարտեր եւ այդ հաշիվներին մուտքագրել ընդհանուր 5.188.233 ՀՀ դրամ գումար: Այնուհետեւ, ստացած բանկային քարտերը փոխանցելով քննությամբ չպարզված անձին, բանկի մասնաճյուղերում իրենց անձնագրերը ներկայացնելով կանխիկացրել են մուտքագրված գումարները՝ բանկի աշխատակիցներին հայտնելով, որ բանկային քարտերն իրենց մոտ չեն գտնվում, սակայն նույն ժամանակահատվածում խմբի անդամ հանդիսացող, ինքնությունը չպարզված անձը վերջիններիս բանկային քարտերով տարբեր բանկոմատներից կատարել է կրկնակի կանխիկացումներ կամ փոխանցումներ:

Քննությամբ տվյալներ են ձեռք բերվել այն մասին, որ 2014թ. նոյեմբերի 10-ից 22-ն ընկած ժամանակահատվածում վերը նկարագրված եղանակով կազմակերպված խմբի անդամները, ըստ նախնական դերաբաշխման, հասցրել են կրկնակի կանխիկացնել եւ «ՎՏԲ-Հայաստան Բանկ» ՓԲ ընկերությունից հափշտակել ընդհանուր 927.869 ՀՀ դրամ գումար, իսկ մնացած 4.260.364 ՀՀ դրամ գումարը չեն կարողացել կանխիկացնել եւ հանցագործությունն ավարտին չեն հասցրել՝ իրենց կամքից անկախ հանգամանքներով:

Նախաքննությամբ ձեռք բերված բավարար ապացույցների համակցությամբ՝ Վրաստանի Հանրապետության հիշյալ հինգ քաղաքացիներից մեկին մեղադրանք է առաջադրվել՝ ՀՀ քրեական օրենսգրքի 34-178 հոդվածի 3-րդ մասի 1-ին եւ 2-րդ կետերով, քրեական գործից վերջինիս վերաբերյալ մասն անջատվել է առանձին վարույթ, հայտարարվել նախաքննության ավարտի մասին, եւ քրեական գործը՝ մեղադրական եզրակացությամբ, ուղարկվել դատարան. նրա նկատմամբ դատարանը պատիժ է սահմանել՝ ազատազրկում՝ 5 տարի ժամկետով:

Վարույթն իրականացնող մարմնի որոշմամբ՝ մյուս չորս անձինք ներգրավվել են որպես մեղադրյալ՝ ՀՀ քրեական օրենսգրքի 34-178 հոդվածի 3-րդ մասի 1-ին եւ 2-րդ կետերով, նրանց նկատմամբ հայտարարվել է հետախուզում եւ որպես խափանման միջոց է ընտրվել կալանավորումը:

2015թ. հուլիսի 29-ին քրեական գործի վարույթը կասեցվել է՝ վերջիններիս գտնվելու վայրը պարզված չլինելու հիմքով:

Ձեռնարկված օպերատիվ որոնողական եւ հետախուզական միջոցառումների արդյունքում հետախուզման մեջ գտնվող անձանցից մեկը 2019թ. հուլիսի 31-ին հայտնաբերվել է ՌԴ իրավապահ մարմինների կողմից եւ արգելանքի վերցվել, այնուհետեւ՝ տեղափոխվել Հայաստանի Հանրապետություն:

2019թ. դեկտեմբերի 24-ին քրեական գործի վարույթը վերսկսվել է, եւ նրան մեղադրանք է առաջադրվել՝ ՀՀ քրեական օրենսգրքի 34-178 հոդվածի 3-րդ մասի 1-ին եւ 2-րդ կետերով: Քննիչը միջնորդություն է ներկայացրել դատարան՝ նրա նկատմամբ որպես խափանման միջոց ընտրված կալանավորումը վերահաստատելու վերաբերյալ, ինչը բավարարվել է:

Վերջինիս վերաբերյալ մասը քրեական գործից անջատվել է առանձին վարույթ, եւ քրեական գործը, մեղադրական եզրակացությունը հաստատելու եւ դատարան ուղարկելու միջնորդությամբ, ուղարկվել է նախաքննության օրինականության նկատմամբ հսկողություն իրականացնող դատախազին:

Մյուս երեք մեղադրյալների, ինչպես նաեւ գործով դեռեւս չպարզված անձի վերաբերյալ մասով նախաքննությունը շարունակվում է: