Մեքենաների ներկրման հարկային մուտքերի փոխարինման այլ աղբյուրներ չեն նախանշվում․ Պարսյան
Մենք նախորդ տարի ունեցանք ավտոմեքենաների աննախադեպ ներկրման ծավալներ, ինչը, կարծում եմ, մեր տնտեսության համար կարճաժամկետ փուլում դրական էֆեկտ ապահովեց։ Այս մասին այսօր՝ փետրվարի 4-ին, լրագրողների հետ հանդիպմանն ասաց տնտեսագետ Սուրեն Պարսյանը։
«Մենք նախորդ տարի ունեցանք ավտոմեքենաների աննախադեպ ներկրման ծավալներ, մոտավորապես 180 հազար ավտոմեքենա, ինչը, կարծում եմ, մեր տնտեսության համար կարճաժամկետ փուլում դրական էֆեկտ ապահովեց, ապահովեց պետական բյուջե մուտքեր, ապահովեց նաև մեր տնտեսության մեջ ծառայության ոլորտի որոշակի աճ՝ ավտոմեքենաների սպասարկում, վերանորոգում և այլն։ Սա պետք է գնահատել որպես կարևոր քայլ, ձեռքբերում։ Սակայն այս երևույթը, ըստ էության, սահմանափակվում է 2020 թվականի հունվարի 1-ով, երբ ուժի մեջ մտան նոր մաքսատուրքերը։ Այս հարկային մուտքերի փոխարինման այլ աղբյուրներ չեն նախանշվում։ Սա խնդիր է, ստվերի հաշվին անընդհատ գումարները չեն կարող ավելացնել»։
Տնտեսագետի կարծիքով՝ կառավարության նախանշած 4,9 տոկոս տնտեսական աճը կարելի է կյանքի կոչել ի հաշիվ ստվերի․ «ՊԵԿ նախագահի տեղակալի հայտարարությամբ մեր մոտ ստվերը կազմում է 20-23 տոկոս։ Նույն կառավարությունը, երբ պլանավորել է 2020 թվականի ընթացքում տնտեսական աճ 4,9 տոկոս, հանգիստ կարող է իրականացնել ի հաշիվ ստվերի։ Այսինքն՝ ունենք ստվերային տնտեսություն, առ այսօր այդ երևույթը պահպանվում է, ավտոմեքենաների շուկայի այդ բոնուսը վերացել է, մենք պետք է մտածենք այլընտրանքային եկամուտների մասին, ցավոք այդ հիմքերը չեն դրվել 2019 թվականին, 2020 թվականին էլ չկան դրանք»։
Սուրեն Պարսյանը նաև վստահ է, որ միակողմանիորեն հայկական ավտոմեքենաների ներկրման սահմանափակումը Ղազախստանում խաթարում է ԵՏՄ-ում ապրանքների, աշխատուժի, կապիտալի ազատ տեղաշարժի փիլիսոփայությունը։
«Մեր պետությունը պետք է պաշտպանի մեր ընկերությունների և քաղաքացիների շահերը։ Եթե ղազախական կողմը խնդիր ունի հայկական համարանիշներով մեքենաների ներկրման հետ, ապա կարող է դիմել ԵՏՄ դատարան և վեճ բարձրացնել այդ հարցով, միակողմանի ձևով հայկական ավտոմեքենաների նկատմամբ սահմանափակումը խաթարում է ԵՏՄ-ում ապրանքների, աշխատուժի, կապիտալի ազատ տեղաշարժի փիլիսոփայությունը։ Մենք չենք անդամակցել ԵՏՄ-ին, որ մեր մեքենաները սահմանափակումներ ունենան։ Այստեղ շատ կարևոր է, որ մեր պաշտոնյաները մեր շահը հասկանան և գնահատե ու պաշտպանեն ամբողջ ծավալով»,-նշեց նա։