Իշխանություններն այս ընթացքում արել են առավելագույնը, որ սահմանադրական դատարանի շուրջ ստեղծված ճգնաժամը չխորանա. Լիլիթ Մակունց

Իշխանություններն այս ընթացքում արել են առավելագույնը, որ սահմանադրական դատարանի շուրջ ստեղծված ճգնաժամը չխորանա։ Այս մասին այսօր՝ փետրվարի 3-ին, լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը:

«Սա արել ենք օրենքի տառին, սահմանադրությանտառին հետևելով, ինչը նաև արտացոլվել է ԵԽԽՎ համազեկուցողների մեկնաբանություններում, չենք խոսում հայտարարության մասին։

Երկրորդ արձանագրումը, որ կցանկանայի անել, այն է, որ Սահմանադրական դատարանն ունի լեգիտիմության խորը դեֆիցիտ, ինչը վերականգնելու համար այսօր պահանջ է դնում մեր առաջ ՀՀ քաղաքացին։ Մենք որպես առաջնային մանդատ կրող ինստիտուտ պարտավոր ենք մեր սահմանադրական պարտավորությունների շրջանակում այս հարցը հանգուցալուծել։ Այդ կապակցությամբ «Իմ քայլը» խմբակցությունը անհրաժեշտ է համարում հրավիրել արտահերթ նիստ, որի օրակարգը կհաստատվի խորհրդի նիստին ընթացքում։ Արտահերթ նիստի ամբողջ իմաստն այն է, որ այն խնդիրները, որ արձանագրեցի, հագուցալուծում ստանան»,-նշեց նա։

Լիլիթ Մակունցը հրաժարվեց բովանդակային մեկնաբանություններից․ «Բոլոր քննարկումները տեղի կունենան Ազգային ժողովի արտահերթ նիստերի ժամանակ, իսկ նպատակը Սահմանադրական դատարանի շուրջ ստեղծված ճգնաժամի շուտափույթ լուծումն է: Նախագծի հեղինակը կներկայացնի այն շեշտադրումները, որ դրել է այդ նախագծի առանցքում, և «Իմ քայլը» խմբակցությունը Ազգային ժողովի լիագումար նիստի ընթացքում իր մեկնաբանություններով հանդես կգա»։

Նա անընդունելի է համարում, որ Սահմանադրական դատարանի նախագահ Հրայր Թովմասյանը քաղաքական մեկնաբանություններով է հանդես եկել․

«Սահմանադրական դատարանի նախագահի պարտականությունները կատարող Հրայր Թովմասյանը հնչեցնում է քաղաքական տեքստեր՝ լինելով Սահմանադրական դատարանի նախագահ: Խոսում է խրամատներից, ինչը արդեն քաղաքական տեքստ է, որի հակառակ կողմում որպես թշնամիներ, ենթադրաբար, ներկայացվում ենք մենք: Սա ի՞նչ է, եթե ոչ քաղաքական տեքստ: Վերջերս Հանրային հեռուստաընկերության ռեպորտաժում մենք ականտես եղանք, որ պաշտոնական հարցմանն ի պատասխան՝ ԱԱԾ-ն պաշտոնական տեղեկատվություն էր տրամադրել առ այն, որ Ռոբերտ Քոչարյանի փաստաբան Արամ Օրբելյանը մի քանի անգամ այցելել է Սահամանդրական դատարան, սա ևս մեկ անգամ արձանագրենք։

Հրայր Թովմասյանը ներկայանում է որպես դատական իշխանության ղեկավար, ինչն այդպես չէ:

Նման ներկայացումը նշանակում է, որ նկրտումներ կան դատական իշխանությունը ուզուրպացնելու համար: Սա վկայություն է նրա, որ ի հակառակ իշխանության ջանքերի՝ չթողնել, որ ՍԴ-ի շուրջ ճգնաժամը խորանա, տեղի է ունեցել հենց հակառակը դատարանի կողմից»։

Մակունցը ասաց նաև, որ Սահամանադրական դատարանի շուրջ ստեղծված վիճակի լուծելու պահանջի ցուցում էին միջազգային երկու կազմակերպությունների կողմից արված հարցումների արդյունքները, համաձայն որոնց՝ հարցվածների 90,5 տոկոսն իրենցից ակնկալում է կոռուպցիայի դեմ պայքարի և դատական համակարգի փոփոխություններին: