Գուղերում անչափահասների կողմից մեքենա վարելու բազմաթիվ դեպքերի հանդիպեցի․ Վարազդատ Կարապետյան
Այսօր Գավառի տարածաշրջանի գյուղերում անչափահասների կողմից մեքենա վարելու բազմաթիվ դեպքերի հանդիպեցի։ Այս մասին այսօր՝ փետրվարի 2-ին, ֆեյսբուքյան իր էջում գրել է «Իմ քայլը» խմբակցության պատգամավոր Վարազդատ Կարապետյանը։
«Խնդրում եմ երեխաներին ու հատկապես նրանց ծնողներին՝ բացառել այս արատավոր պրակտիկան։ Բոլորս գիտենք, թե անցյալում ինչ ողբերգական հետևանքներ ենք ունեցել սրա պատճառով։
Ոստիկանության և հատկապես Ճանապարհային ոստիկանության ուշադրությունը պետք է կենտրոնանա այս հարցի վրա։
Ձեր խնդիրը ոչ թե պատժելը, տուգանելն ու տուգանքից տոկոս ստանալն է, այլ կարգավորելը։
Կարգավորելու համար ճանապարհային ոստիկանության մեքենաները պետք է հերթապահեն խնդրահարույց կետերում՝ շուկաների մոտ, մեքենաների կուտակման վայրերում, ձնաբքի կամ մերկասառույցի ժամանակ, այլ ոչ թե սահմանափակող ճանապարհային նշանների կամ կտրուկ շրջադարձերի հարևանությամբ։
Կարգավորելը կարգազանցության կամ խախտման կանխումն է, այլ ոչ թե արձանագրումն ու տուգանումը։
Սա պետք է լինի ոստիկանության հիմնական կարգախոսը»,-նշել է նա։