Հայթաղում հուղարկավորեցին մահացած զինծառայողին. ներկա էր Դավիթ Տոնոյանը (Տեսանյութ)

Արցախում հունվարի 30-ին մահացած զինծառայող Վահրամ Ավագյանին այսօր՝ փետրվարի 2-ին, հուղարկավորեցին հայրենի Հայթաղ գյուղում:

Հուղարկավորությանը մասնակցում էր նաեւ պաշտպանության նախարար Դավիթ Տոնոյանը:

Հիշեցնենք, որ զինվորի հարազատներն այսօր ավելի վաղ նրա դաղագը քայլերթով բերել էին Երեւան՝ ի նշան մահվան վերաբերյալ շրջանառվող ինքնասպանության վարկածի դեմ բողոքի: Հարազատները վստահ են, որ զինծառայողը սպանվել է, ինչը նրանք հայտնեցին նաեւ իրենց հետ հանդիպման գնացած Պնախարար Դավիթ Տոնոյանին՝ պահանջելով բացահայտել տեղի ունեցածը եւ պատժել մեղավորներին: Զինվորի բարեկամները եւ համագյուղացիները քայլելով հասան մինչեւ Երեւան՝ մինչեւ Արգավանդի խաչմերուկ, որտեղ նրանց դիմավորեցին ոստիկանական մեծաթիվ ուժեր՝ փակելով ճանապարհը:

Չկարողանալով առաջ ընթանալ՝ զինվորի հարազատները որոշ ժամանակ հավաքված մնացին այնտեղ, ապա նախարարի՝ երկարատեւ հորդորներից հետո ի վերջո համաձայնեցին վերադառնալ գյուղ եւ հուղարկավորել զինվորին:

Նշենք, որ Դավիթ Տոնոյանը հայտնել էր, որ գործով 3 ձերբակալված կա, բոլորն էլ զինվորի համածառայակիցներն են: Նրանց թվում է ԱԺ նախկին պատգամավոր Առաքել Մովսիսյանի (Շմայսի) որդին:

Վահրամ Ավագյանը բանակ էր զորակոչվել 6 ամիս առաջ, ծառայում էր Արցախում: Զինվորը մահացել է հունվարի 30-ին՝ ժամը 13:15-ի սահմաններում: Քննչական կոմիտեն հայտարարել է, որ զինվորն իրեն ամրակցված ԱԿՄ տեսակի ինքնաձիգից կրակոցներ է արձակել իր կրծքավանդակի շրջանում և ստացած հրազենային վնասվածքներով տեղափոխվել զինվորական հոսպիտալ, որտեղ ժամը 14:00-ին արձանագրվել է վերջինիս կենսաբանական մահը: Դեպքի առթիվ առաջին կայազորային քննչական բաժնում ՀՀ քրեական օրենսգրքի 110-րդ հոդվածի 1-ին մասով հարուցվել քրեական գործ, կատարվում է նախաքննություն: