Ինչո՞ւ չեղարկվեց Ջամալայի համերգը Երեւանում. «Դրիմ փրոջեքթ»-ը պարզաբանում է

Փետրվարի 14-ին  Երեւանում «Դրիմ փրոջեքթ»-ի նախաձեռնությամբ առաջին անգամ պետք է կայանար հայտնի երչուհի Ջամալայի մենահամերգը, սակայն երգչուհու պաշտոնական էջում երեկ հրապարակվեց տեղեկություն, որ համերգը չի կայանալու։ Բացի այդ 168.am-ին  երգչուհու PR տնօրեն Դենիս Կոզլովսկին հայտնել էր, որ Ջամալայի Երեւանում կայանալիք համերգի համար հարցում եղել է, բայց կազմակերպիչներն այն չեն հաստատել։

«Դրիմ փրոջեքթ»-ի  ներկայացուցիչ Հայկ Անդրեասյանը,  պարզաբանելով ստեղծված իրավիճակը,  նշում է, որ խնդիրն առաջացել է  Ջամալայի ներկայացուցիչների ուղարկած  ադրբեջանական բանկի հաշվեհամարից:

«Համերգի համար, երբ որ առաջին պայմանագիրը իրենք ուղարկեցին, նշված էր, որ 2019թ․-ի դեկտեմբերի 17-ին մենք կանխավճար պետք է փոխանցեինք, բայց, քանի որ առջեւում Ամանորն էր, մենք պայմանավորվեցինք փոխանցումը կատարել  հունվարի 10-ին, իրենք համաձայնեցին: Խնդիրն առաջացել է այն բանից, որ Ջամալայի ներկայացուցիչները մեզ ուղարկել են  ադրբեջանական  բանկի հաշվեհամար, չնայած, որ բանկը գտնվում է Լոնդոնում, բայց  Բաքվի '»MuganBank»-ն է:

Դե, բնակաբար, Հայաստանից Ադրբեջան փոխանցում հնարավոր չեղավ իրականացնել։ Հետո մենք  խոսեցինք իրենց հետ, բացատրեցինք իրավիճակը, նրանք մեզ առաջարկեցին գնալ Թիֆլիս եւ այնտեղ առձեռն տալ մի մարդու այդ գումարը, բայց այդպես մենք չհամաձայնեցինք: Առաջարկեցինք, որ մեզ տրամադրեն այլ բանկի հաշվեհամար: Սպասեցինք , որ մեզ  ուղարկեն նոր հաշվեհամար այլ բանկից, որը նրանք տրամադրել են 3 օր առաջ: Մենք նոր հաշվեհամարով կազմեցինք պայմանագիրն ուղարկեցինք, որ հաստատեն: Բայց առանց մեզ պատասխանելու նրանք չեղարկեցին համերգը, որի մասին մենք ինքներս տեսանք Ջամալայի էջում»,- ասաց Հայկ Անդրեասյանը:

«Դրիմ փրոջեքթ»-ի  ներկայացուցիչը նաեւ կարեւորեց այն, որ տոմսերի վաճառքը սկսվել է միայն այն բանից հետո, երբ Ջամալայի պաշտոնական էջում իրենց կողմից տեղադրվել էր Երեւանում կայանալիք համերգի մասին տեղեկությունը:

«Իրենց հետ ընթացող բանակցությունների բոլոր մանրամասները մեզ մոտ կա՝ ուղարկված պայմանագրերը, նկարները եւ շատ այլ մանրամասներ:  Քանի որ հաշվեհամարի խնդիրն էր միայն, որը իրենց կողմից էր առաջացել, ապա երկկողմանի որոշվեց, որ տոմսերի վաճառքն արդեն կարող ենք սկսել միչեւ այդ հարցի կարգավորումը: Այն պահից, երբ Ջամալայի պաշտոնական էջում տեղադրվեց պաստառն առ այն, որ Ջամալան այստեղ կունենա համերգ, սկսվեց տոմսերի վաճառքը: Իր էջից ուղիղ հղումով անցնելով Tomsarkgh.am՝  մարդիկ գնում էին տոմսեր: Առանց իր պաշտոնական էջի հայտարարության մենք չէինք կարող սկսել գովազդային արշավը: Ասեմ ավելին՝ մենք ամբողջությամբ իրենց թելադրած կանոնակարգով ենք շարժվել», - հավելեց  Հայկ Անդրեասյանը:

 Նա նաեւ նշեց, որ ամբողջ խնդիրը միայն ադրբեջանական բանկի հետ էր կապված, եւ նրանց կողմից անսպասելի չեղարկումը անհասկանալի էր, իսկ բոլոր նրանք, ովքեր ձեռք են բերել տոմսեր, կարող են վերադարձնել եւ վերցնել գումարը: