Ասանժի փաստաբանները Էկվադորի դեսպանատանը նրան լրտեսելու մասին վկայություններ են ներկայացրել իսպանական դատարանին
Ջուլիան Ասանժին պաշտպանող իսպանացի փաստաբանների խումբը Իսպանիայի ազգային դատական պալատին ներկայացրել է փաստաթղթեր, որոնք վկայում են այն մասին, որ 2012-2019թթ․ Լոնդոնում Էկվադորի դեսպանատանը թաքնվող՝ WikiLeaks-ի հիմնադրին անօրինական հետեւել է իսպանական մասնավոր ընկերությունը, հայտնում է DW-ն։
Ընկերությունն իրականացրել է դիվանագիտական ներկայացուցչության շենքի պահպանությունը։ Այս մասին հունվարի 29-ին հայտնել է մադրիդյան տեղեկատվական Europa Press գործակալությունը՝ հղում կատարելով Ասանժի փաստաբանների խմբին, որի գործունեությունը համակարգում է իսպանացի հայտնի իրավաբան Բալտասար Գարսոնը։
Ասանժին, ինչպես նաեւ բոլոր նրանց, ովքեր այցելել են նրան դեսպանությունում, լրտեսել է անվտանգության ծառայություն իրականացնող UC Global ընկերությունը, որի գլխավոր գրասենյակը երկրի հարավային Խերսես Դե Լա Ֆրոնտերա քաղաքում է։ Ընկերության աշխատակիցները, ինչպես նշում է Europa Press-ը, դա արել են իրենց ղեկավար Դավիդ Մորալեսի հրահանգով, որը Las Vegas Sands ամերիկյան ընկերության միջոցով կապված է եղել ՀԿՎ-ի հետ։ Ստացված փաստաթղթերը իսպանացին անձամբ է տարել ԱՄՆ։
Փաստաբանների նյութերում, որոնք ստացել են Մորալեսի նախկին աշխատակիցներից մեկից, ասվում է, որ լրտեսումը կատարվել է շուրջօրյա՝ տեսախցիկների եւ ձայնագրող սարքերի միջոցով։ Գաղտնալսվել են Ասանժի հեռախոսազրույցները, ինտերնետ-չատերը, նայվել են էլեկտրոնային նամակները եւ ձեռքով արված գրառումները։
Լրտեսումը առնչվել է նաեւ Ասանժին այցելողներին։ Դեսպանության այցելուները, որոնց գաղտնի լուսանկարել են, ստիպված են եղել իրենց փաստաթղթերն ու հեռախոսները թողնել անվտանգության ծառայության մոտ, որի աշխատակցները պատճենել են դրանք եւ վերցրել sim-քարտերի տվյալները։ Ընդ որում, Մորալեսն աշխատակիցներից պահանջել է հատուկ ուշադրություն դարձնել Ռուսաստանից այցելուներին։
Այսպիսով, ինչպես նշում է տեղեկատվական գործակալությունը, Մորալեսը անօրինական կերպով դոսյե է հավաքել բազմաթիվ անձանց, այդ թվում տարբեր երկրների դիվանագետների եւ քաղաքական գործիչների, լրագրողների, իրավաբանների եւ նույնիսկ Ասանժին այցելող բժիշկների մասին։ Իր աշխատակիցներին տված գրավոր հրահանգներից մեկում Մորալեսը պահանջել է գտնել ինչ-որ նորածնի փամփերսը՝ ԴՆԹ անալիզ անելու համար։ Ենթադրվել է, որ Ասանժը կարող է նրա հայրը լինել։
Ասանժի փաստաբանները Մորալեսին մեղադրում են իրենց պաշտպանյալի անձնական կյանքին միջամտելու եւ նրա ու նրա պաշտպանների խոսակցությունները գաղտնալսելու մեջ։ Այս գործողությունների, ինչպես նաեւ կաշառելու եւ անօրինական ստացած փողերի լվանալու համար, ինչի մեջ նույնպես մեղադրվում է Մորալեսը, Իսպանիայի ՔՕ-ն պատիժներ է նախատեսում։ Միաժամանակ, Ավստրալիայի քաղաքացի Ասանժը, որը ժամանակին բազմաթիվ գաղտնի փաստաթղթեր էր հրապարակել Աֆղանստանում, Իրաքում եւ Գուանտանամոյում ամերիկյան զինվորականների գործողությունների մասին, շարունակում է անազատության մեջ մնալ Մեծ Բրիտանիայում՝ սպասելով ԱՄՆ-ին իր արտահանձնման որոշմանը։