Չկա ո'չ օդային , ո'չ ցամաքային ճանապարհ, սիրիահայերն ուզենան էլ` չեն կարող Հայաստան գալ

Սիրիայում տեղի ունեցող զարգացումները չեն կարող անտարբեր թողնել հայկական կողմին: Սփյուռքում բնակվող մեր հայրենակիցների իրավիճակի մասին տեղեկություններ ստանալու համար Operativ.am-ի լրագրողը զրուցեց ՀՀ սփյուռքի նախարարության աշխատակազմի ղեկավար Ֆիրդուս Զաքարյանի հետ:

-Պարո'ն Զաքարյան, ի՞նչ իրավիճակ է հիմա Սիրիայում, մասնավորապես, ի՞նչ իրավիճակում են գտնվում սիրիահայերը:

-Հայկական համայնքն ինչ-որ առումով իմունիտետ է ձեռք բերել բարդ իրավիճակում: Այս պահին էլ սիրիահայերի շրջանում խուճապ գոյություն չունի, թեև կա լուրջ տագնապ: Ի տարբերություն նախորդ ժամանակաների, հիմա դրությունն  ավելի սրվելու հավանականություն ունի: Անընդհատ կապի մեջ ենք, տիկին նախարարն ամեն օր խոսում է  հայկական կառույցների ղեկավարների, Դամասկոսի մեր դիվանագիտական ներկայացուցիչների հետ: Այսինքն հստակ ինֆորմացիա ունենք: Հուսանք, որ կտրուկ  սրումներ չեն լինի և սիրիահայերը ստիպված չեն լինի մասսայական կերպով դուրս գալ այնտեղից: Մի բան կարող եմ ասել, որ Հայաստան ժամանող սիրիահայերի համար ամեն բան կարվի, ցույց կտրվի օժանդակություն, ինչպես որ մեկ տարի առաջ էր: Բոլոր դեպքերում լինենք լավատես և հուսանք, որ դեպքերի այդպիսի զարգացում չի լինի:

-  Շա՞տ են սիրիահայեր, ովքեր դիմում են Հայաստան գալու խնդրանքով:

- Հիմա չկա ո'չ օդային , ո'չ ցամաքային ճանապարհ: Հայաստան գալ  ցանկացողներ լինեն-չլինեն, միևնույն է, այս պահին այդ հարցը չի կարող լուծվել: Այն սիրիահայերը, որ հիմա գալիս են Հայաստան, նախկինում Լիբանան անցած մարդիկ են և Հայաստան են ժամանում  Բեյրութ-Երևան չվերթով:

- Եթե բոլոր ճանապարհները փակ են, ինչպե՞ս կարող է Հայաստանն օգնել սիրիահայերին:

-Այս պահին որևէ օգնություն` ֆինանսական լինի, թե` այլ,  չենք կարող ցուցաբերել: Երբ ճանապարհները բացվեն, այդ ժամանակ էլ նման հնարավորություն կունենանք: Բայց, Սիրիայում հայ համայնքի ղեկավար մարմիններն արդեն փորձ ունեն և կարողանում են օգնություն ցույց տալ: Օրինակ` մի քանի օր հաց չի եղել, բայց հայ համայնքը կազմակերպել է. հացն առանձին թխվել և բաժանվել է հայերի մեջ: Առօրյա այսպիսի խնդիրներ հաճախ են լինում: 

 -Հստակ թիվ կարո՞ղ եք նշել,  թե որքա՞ն հայ կա հիմա Սիրիայում:

-Այո, Մինչև քաղաքացիական պատերազմը Սիրիայում ոչ պաշտոնական տվյալներով 100.000 հայ կար, պաշտոնական` 80.000 հայ: Ա’յս պահին  շուրջ 50000 հայ կա:

Զրուցեց Գայանե Շահինյանը