Հուսով եմ՝ 37 թվականին չենք վերադարձել, երբ մարդու անձնական կյանքը դարձել է հանրային իշխանությունների ուսումնասիրման առարկա. Հրայր Թովմասյան

Չեմ ուզում հավատալ մամուլի հրապարակումներին, որ վարչապետի մոտ եղել է խորհրդակցություն, այցելել է կոնկրետ մարմիններ, բայց օդում կախված է մնում այդ ամենը եւ դա անուղղակի կերպով հաստատվում է վարչապետի այդքան իրազեկվածությունից բոլոր գործերին: Այս մասին 168TV-ի՝ Սաթիկ Սեյրանյանի հեղինակային «Պրեսսինգ» հաղորդաշարի ընթացքում ասել է Սահմանադրական դատարանի նախագահ Հրայր Թովմասյանը՝ անդրադառնալով պնդումներին, թե Նիկոլ Փաշինյանն անմիջականորեն է ղեկավարում իր դեմ արշավը:

Նիկոլ Փաշինյանի այն հայտարարությանը, որ անհրաժեշտ է հետաքննություն անցկացնել եւ պարզել, թե Հրայր Թովմասյանի արտասահմանյան այցերի ազգային անվտանգության սպառնալիք լինելու հարցը, ՍԴ նախագահն արձագանքեց․ «Հուսով եմ մենք 37 թվականին չենք վերադարձել, երբ մարդու անձնական կյանքը դարձել է հանրային իշխանությունների ուսումնասիրման առարկա։ Պաշտոնական երկու այց եմ ունեցել, մեկը Սանկտ Պետերբուրգ, մյուս՝ Լատվիա: Անձի վերաբերյալ օրենքով չնախատեսված նպատակով տվյալներ հավաքելը եւ տարածելը հոդվածի հետ կապված թող զգույշ լինեն, եւ եթե ոմանք էկրանների առջեւ տեսել են, որ տղաս ՈՒԵՖԱ-ի մրցաշարին էր մասնակցում, որն անց էր կացվում Մինսկում, եւ ես իմ արձակուրդում գտնվելով գնացել էի հետեւելու, դա ազգային անվտանգության սպառնալիք է, երկրորդը, որ ունեի առողջական խնդիր եւ ինձ խորհուրդ էր տրվել Մոսկվայում գործող կլինիկա, խնդրեմ, ուսումնասիրեք։ Բայց հիշեք, որ այս ուխտը մի օր էլ ձեր դռանն էլ է չոքելու, մի օր էլ դուք եք պատասխան տալու՝ ուր էիք գնացել, ում հետ էիք խոսում, երբ եք ում հետ հանդիպել եւ այլն»։

Դիտարկմանը, որ սկզբից չեն պահանջել Հրայր Թովմասյանի հրաժարականը, հետո են հասկացել, նա արձագանքեց․ «Շնորհակալություն, որ չեք պահանջել, բայց դուք դրա իրավունքն ունեի՞ք։ Մենք իրավական պետություն եք, մենք իրավունքո՞վ ենք խոսում թե՞ քրեական ենթամշակույթին բնորոշ տարրերով, պանյատներով ենք խոսում, որ եկել ենք իշխանության, ապեր պետք ա գնաս, եթե էս ա, խնդրեմ։ Եթե կա խախտում, եթե հիմք կլինի՝ խնդրեմ»։

Անդրադառնալով հարցին, թե արդյոք վարչապետը վախենում է ՍԴ-ից, Թովմասյանը պատասխանել է, որ ՍԴ-ն բոբո չէ և նրանից չպետք է վախենալ, այն ոչ մեկին չի դատում։ 

Նրա խոսքով, ՍԴ-ն բոլորին՝ դիմողներին ու չդիմողներին միայն օգնում է. «Վախերի շրջանակը անհեթեթությունների է հասնում։ Վախերից մեկի մասին բարձրաձայնեց վարչապետը, ես չեմ կարողանում հասկանալ՝ ինչպես կարող ենք դրան մասնակցություն ունենալ։ Վախերից մեկը նշվում էր, որ Ստամբուլյան կոնվենցիան է, երկորդը Արցախի հետ կապված ինչ-որ պրոցեսներ, երրորդը, որ նպատակ կա առանց դատավճռի սեփականության օտարման մասին օրենք բերել, հաջորդ վախը կոնկրետ գործերի հետ էր կապված, եւ վերջապես վերջինը, որ ՍԴ-ն ինչ-որ մեխանիզմներով պիտի իրենց պաշտոնավարման մասին որոշում կայացներ։ Մեր լիազորությունների մեջ նման բան չկա»:

Վարչապետի հայտարարությանը, թե մենք ՀՀ սահմանադրությամբ նախատեսված ՍԴ չունենք, Հրայր Թովմասյանն արձագանքեց․ «Սա նշանակում է, որ մենք պետություն չունենք։ ՍԴ-ն մի մարմին է, որով աշխատում է ողջ պետական համակարգը։ Եթե չունենք ՍԴ, ապա պետություն չունենք։ Ես երբ ասում եմ, որ պետք է զգույշ լինել արտահայտությունների մեջ, նաեւ նման արտահայտությունները նկատի ունեմ։ Մի օր կգան եւ կասեն՝ դուք չեք ունեցել ՍԴ եւ այս 100 միլիոնը իրավունք չունեիք վերցնելու»։

Նիկոլ Փաշինյանի պնդմանը, թե չկա դատավոր որ իր ասածը չանի, Թովմասյանն արձագանքեց․ «Հայաստանում չի կարող լինել մի դատավոր, որ իր ասածը անի։ Ֆորմալ առումով կարող են լինել մարդիկ, որ իր ասածը կանեն, բայց բովանդակային առումով այդ մարդիկ ինձ համար այլեւս դատավոր չեն: Դատավորի էությունն այն է, որ նա ոչ մեկի ասածը պետք է չանի»։

Թովմասյանն ասաց, որ իր համար անհասկանալի է ՍԴ դատավորների վաղ կենսաթոշակի մասին օրենքի նպատակը․ «Նախագահի ստորագրելուց հետո «պատահական» զուգադիպությամբ ՍԴ-ում հայտվում է ՀՔԾ քննիչը։ Ես ուզում եմ հասկանալ, թե որն է շտապելու պատճառը, ով էր ընկել ձեր հետեւից, որ արագացված ռեժիմով քննարկեցիք, ինչու 2 ամիս, ինչ-որ բաների հետ է գուցե կապված։ Իսկ մի պահ մտածե՞լ եք՝ դրանից հետո ինչ է լինելու, ինչու չեք գրել, որ թոշակի անցնելուց հետո դատավորները շարունակում են պաշտոնավարել, մինչեւ նոր մարդկանց նշանակումը, հակառակ դեպքում կարող եք ՍԴ իրական ճգնաժամ ստանալ։ Երկու դատավորով չեն կարող գործ քննել։ Իսկ կարո՞ղ է արտահերթ ընտրություն լինի եւ արդյունքները ոչ մի տեղ չկարողանաք վիճարկել, նոր վարկ ստանալու անհրաժեշտություն լինի, չկարողանաք, մարդու իրավունքների պաշտպանության ողջ համակարգը քանդվի, որովհետեւ ՍԴ գոյություն չունի»։