Վեցամյա աղջիկը փրկել է ընտանիքին հրդեհի մեջ զոհվելուց
ԱՄՆ-ից վեցամյա աղջիկը փրկել է ծնողներին եւ կրտսեր եղբորը հրդեհի մեջ զոհվելուց, հայտնում է Lenta-ն՝ հղում կատարելով USA Today-ին։
Հունվարի 18-ին վեցամյա Մադալին Կառլբոն, նրա երկամյա եղբայրը եւ ծնողները պառկել են քնելու ամերիկյան Նյու Ջերսի նահանգում գտնվող իրենց տանը։ Ժամը մոտ 2։17 Մադալինը արթնացել է աչքերում եւ կոկորդում այրոցքից։ Նա տեսել է, որ տունը ծխով լի է եւ լսել է, որ աշխատում է հրդեհային ազդանշանը։
Աղջկան չի հաջողվել արթնացնել քնած մորը, սակայն նա վազել է երկրորդ հարկ եւ արթնացրել հորը։ Նա անմիջապես աղջկան ու եղբորը դուրս է բերել փողոց ու վերադարձել է տուն՝ կնոջ հետեւից։ Ընտանիքի բոլոր անդամները ժամանակին լքել են այրվող տունը։
Դեպքի վայր ժամանած հրշեջները պարզել են, որ հրդեհի պատճառը անսպասելի բռնկված խոհանոցային գազօջախն է։ Տունը լուրջ վնասվելու պատճառով վերականգնման ենթակա չէ։ Ընտանիքը ստիպված է ժամանակավորապես տեղափոխվել հյուրանոց։ Նրանք երախտապարտ են դստերը իրենց կյանքը փրկելու համար եւ նրան իսկական հերոս են համարում։