Արդարադատության նախարարը մեկնաբանել է գեներալ Մանվել Գրիգորյանին կալանքից ազատելը
Ես դժվարանում եմ հանրային կարծիքի տեսանկյունից մեկնաբանել «Երկրապահ» կամավորական միության նախկին ղեկավար Մանվել Գրիգորյանի նկատմամբ խափանման միջոցը փոխելու դատարանի որոշումը, բայց այդպիսի միջոցներ չպետք է կիրառվեն այն դեպքերում, երբ դա անհամատեղելի է անձանց կալանքի մեջ պահելու հետ նրանց առողջական խնդիրների առկայությամբ: Այս մասին հունվարի 22-ին ԱԺ նիստում ասաց արդարադատության նախարար Ռուստամ Բադասյանը՝ պատասխանելով իշխող «Իմ քայլը» դաշինքի պատգամավոր Լիլիթ Ստեփանյանի հարցին:
Բադասյանը նշեց, թե տեղեկություն ունի այն մասին, որ Գրիգորյանի առողջական խնդիրները սրվել են: «Այդ հարցը մեր իրավազորության ներքո չէ, այլ մեծապես իրավապահ մարմինների ոլորտում է: Եվ որոշվել է, որ այս դեպքում հետագայում կալանավորված պահելը եւ ազատազրկումը ոչ մի նպատակ չի ունենա»,- ընդգծեց արդարադատության նախարարը:
Հիշեցնենք, որ դատարանը որոշել էր նախկին պատգամավոր Մանվել Գրիգորյանին ազատել չհեռանալու մասին ստորագրությամբ: Գեներալը կալանավորված էր արդեն 1,5 տարի, նա այս ընթացքում ազատվել էր միայն 20 օրով: Գրիգորյանին եւ նրա կնոջը՝ Նազիկ Ամիրյանին, մեղադրում են ապօրինի զենք եւ ռազմամթերք պահելու, ավելի քան 100 մլն դրամ գումարի ունեցվածք յուրացնելու, հարկերի վճարումից խուսափելու եւ պետական ունեցվածքի վատնման մեջ: