«Կուտոյանի դին հայտնաբերել է կինը. դեպքի վայրում զենք կա». ՔԿ փոխնախագահ (Ուղիղ)

Դեպքի վայրի զննություն է կատարվում, այդ գործողության արդյունքում ձեր հարցերին ես կկարողանամ պատասխանել: Այս մասին, այսօր՝ հունվարի 17-ին, լրագրողների հետ զրույցում նշեց ՀՀ քննչական կոմիտեի նախագահի տեղակալ-հատկապես կարեւոր գործերի քննության գլխավոր վարչության պետ Արթուր Մելիքյանը՝ անդրադառնալով ԱԱԾ նախկին տնօրեն Գեորգի Կուտոյանի մահվան հանգամանքներին:

«Մենք որ եկել ենք դեպքի վայր, եղել է կինը եւ հայրը: Նախնական, այն ինչ օպերատիվ ծառայողները մեզ ներկայացրեցին, կինն է հայտնաբերել դին: Դեռ հարեւանների հետ չենք խոսել: Տարածքն ամբողջական տեսախցիկներով կահավորված է, որպեսզի ապացույց չկորցնենք: Ինքնասպանության վարկածով եւս աշխատում ենք»,-ասաց նա:

Մելիքյանը հավելեց, որ դեպքի վայրում զենք կա, սակայն չի կարող ասել՝ այն օրինական է, թե ոչ, քանի որ չի տեսել զենքը:

«Դատական բժիշկներ են մասնակցում, կպարզենք՝ քանի վնասվածք կա»,-ասաց նա:

Մնացած հարցերին Մելիքյանը պատասխանում էր, որ տեղյակ չէ, զննությունից հետո, մոտ 1-1,5 ժամ անց կկարողանա պատասխանել հարցերին:

Ավելի վաղ հայտնել էինք, որ Երևան քաղաքի Պարույր Սեւակի փողոցի բնակարաններից մեկում հայտնաբերվել է ԱԱԾ նախկին պետ Գեորգի Կուտոյանի դին՝ հրազենային վիրավորումով:

«Հրապարակի» տեղեկություններով՝ ոստիկանները երբ մտել են նրա բնակարան, դիակի զննության ժամանակ դիակի կողքը հայտնաբերել են կոնյակի շիշ, որը դատարկ է եղել, նաև ատրճանակ, որը Կուտոյանի անձնական զենքն է եղել: Կրակոցն արձակվել է հենց այդ զենքից և բերանին։

Կայքի տեղեկություններով` դեռևս հայտնի չէ, թե ում տանն են հայտնաբերել ԱԱԾ նախկին տնօրենի դին, քանի որ ըստ հայտարարագրի Կուտոյանը ընդամենը մի բնակարան է ունեցել , և այդ բնակարանը գտնվում է Շենգավիթ վարչական շրջանում Ս․ Զորավարի փողոց 44-1 հասցեում։

Կուտոյանն ամուսնացած էր և 4 տարեկան անչափահաս երեխա ուներ, նա 39 տարեկան էր: