«Իմ քայլի» պատգամավորները ցանկանում են մագիստրանտներին և ասպիրանտներին հարկից «ազատել»
Կառավարության եւ իշխող «Իմ քայլը» դաշինքի ծրագրերի համաձայն՝ աշխատանքներ են կատարվում աղքատության դեմ պայքարի խրախուսման ուղղությամբ, հատկապես կրթության եւ նոր աշխատատեղերի ստեղծման միջոցով: Այս մասին հունվարի 15-ին Տնտեսական հարցերով խորհրդարանական մշտական հանձնաժողովի նիստում Հարկային օրենսգրքում լրացումներ կատարելու մասին օրինագծի քննարկման ժամանակ ասաց օրինագծի համահեղինակ, իշխող «Իմ քայլը» դաշինքի պատգամավոր Սիսակ Գաբրիելյանը:
Ըստ օրինագծի՝ հնարավոր կլինի եկամտահարկի միջոցները հետ ստանալ այն չափով, որքան պահանջվում է բուհերում ուսանելու համար: Խոսքը մագիստրատուրայում եւ ասպիրանտուրայում սովորողների մասին է: Պատգամավորը նշեց, որ շատ բուհեր արդեն պատրաստակամություն են հայտնել աշխատող ուսանողների ուսուցումը սկսել 18:30-ից: «Որոշ բուհեր արդեն աշխատում են այս ռեժիմով: Նույնիսկ մի քանի ֆակուլտետներ կան, որոնք ուսուցում են ապահովում անգամ շաբաթ օրը»,- պարզաբանեց Գաբրիելյանը՝ հավելելով, որ մագիստրանտները եւ ասպիրանտները կկարողանան այս արտոնությունից օգտվել ընդամենը 2 տարի եւ մեկ անգամից ոչ ավելի:
Խորհրդարանականի խոսքով՝ նման արտոնությունը կգործի պետպատվերի շրջանակում, որը Կառավարության կողմից հաստատվել է որոշակի ուղղություններով եւ մասնագիտություններով: «Ինչպես ձեզ հայտնի է, Հայաստանում կան մասնագիտություններ եւ ոլորտներ, որոնց պահանջարկը բավականին մեծ է, սակայն մենք անհրաժեշտ մասնագետներ եւ փորձագետներ չունենք: Դա թե՛ բարձր տեխնոլոգիաների ոլորտն է, թե՛ գյուղատնտեսությունը, ինչպես նաեւ շինարարական ոլորտը»,- ասաց Գաբրիելյանը:
Սակայն Կառավարությունը՝ ի դեմս ֆինանսների փոխնախարար Արման Պողոսյանի, դեմ հանդես եկավ այս օրենսդրական նախաձեռնությանը՝ որոշակի մտահոգություն եւ կասկածներ հայտնելով գործնականում այն իրականացնելու առումով: Դրանից բացի, փոխնախարարի կարծիքով՝ օրինագիծը մեծացնում է հնարավոր ռիսկերի թիվը, այդ թվում՝ նաեւ կոռուպցիոն:
Նշենք, որ օրինագծի համահեղինակն է «Իմ քայլը» դաշինքի խմբակցության ղեկավար Լիլիթ Մակունցը:
Բավականին երկար քննարկումներից հետո օրինագիծն, այնուամենայնիվ, ստացավ խորհրդարանական հանձնաժողովի դրական եզրակացությունը եւ կներառվի հարցերի ցուցակի մեջ, որոնք պետք է քննարկվեն խորհրդարանի առաջիկա քառօրյայում: