Քաղաքապետարանը բնակիչներից հավաքում է հնարավոր բոլոր հարկերը, բայց երբ հայտնվեցի ծանր վիճակում Արամի 23-ի շենքի փլուզման արդյունքում, մնացի մենակ. Մադլենա Սարոյան
Երեւանի քաղաքապետարանը բնակիչներից հավաքում է հնարավոր բոլոր հարկերը, սակայն երբ ես հայտնվեցի ծանր վիճակում Արամի 23-ի շենքի փլուզման արդյունքում, քաղաքի իշխանությունները չեն ցանկանում օգնել ինձ: Այս մասին «Միջազգային ճանաչում ունեցող երգչախմբի անորոշ վիճակը, Արամի 23 եւ մյուս պատմամշակութային շենքերի խնդիրը նոր Հայաստանում» թեմայով քննարկման ժամանակ հայտարարեց Արամի 23-ի շենքին հարակից տան բնակչուհի Մադլենա Սարոյանը:
«Իմ բնակարանը եւս տուժել է եւ փաստացի անպիտան է բնակության համար: Ես ստիպված եմ իմ հաշվին տուն վարձել, եւ նման պայմաններում քաղաքի իշխանությունները հայտարարում են, որ չեն կարող որպես կողմ հանդես գալ եւ պաշտպանել քաղաքացիների շահերը: Մեկ տարվա ընթացքում քաղաքապետարանից ինձ վրա ոչ ոք ուշադրություն չդարձրեց, ոչ ոք չհետաքրքրվեց, թե ես որտեղ եմ բնակվում, սակայն երբ գործը հասավ հարկերին եւ վճարումներին, ժամանակ գտան եւ հիշեցին»,- ասաց նա՝ դիմելով Երեւանի քաղաքապետարանի մամուլի քարտուղար Հակոբ Կարապետյանին:
Հիշեցնենք, որ 2019 թվականի հունվարի 11-ին փլուզվել էր Երեւանի Արամի 23 հասցեում գտնվող մշակութային հուշարձան հանդիսացող շենքի պատը, ինչի հետեւանքով տուժել էր նաեւ հարակից տունը: