Վարչապետը և զգաց, որ այդտեղ կա մտահոգություն, բայց նաև հանձնարարություն տվեց. Դավիթ Անանյան

Վարչապետը եւ զգաց, որ այդտեղ կա մտահոգություն, բայց նաեւ քաղաքական առումով հանձնարարություն տվեց, որը մենք իրականացնելու ենք քննարկումների միջոցով: Այս մասին, այսօր՝ հունվարի 13-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը՝ անդրադառնալով վարչապետ Նիկոլ Փաշինյանի առաջարկին, ըստ որի գնորդներին հնարավորություն պետք է տալ տեսանկարահանել ՀԴՄ կտրոն չտվող տնտեսվարողին, որի հիման վրա վարույթ կհարուցվի, ինչպես դա արվում է ճանապարհային երթեւեկության ոլորտում:

Անանյանի խոսքով, այդտեղ կա որոշակի խնդիր անձի անձնական տվյալների պաշտպանության հետ կապված:

«Եթե օրինակ, ոստիկանության կողմից իրականացվող գործիքակազմի շրջանակներում նույնականացվում է խախտում կատարած ավտոմեքենան, հետեւաբար, նաեւ սեփականատերը, ապա հարկային իրավախախտման պարագայում, դա ոչ թե խախտում է, այլ տնտեսական գործառնություն է տեղի ունենումանձանց միջեւ: Այդտեղ նախ պետք է իդենտիֆիկացվի տնտեսվարող սուբյեկտը, ինդենտիֆիկացվի համապատասխան անձը, որ դրամական հաշվարկներ է իրականացնում, պետք է իդենտիֆիկացվի նաեւ գնում կատարող անձը: Եթե ոստիկանության դեպքում սկսվում է միանգամից հարուցման փուլը, ապա մեր պարագայում մինչեւ հարուցումը պետք է լինի նախնական փուլ, որտեղ պետք է ապացուցողական որոշակի գործընթացներ տեղի ունենան»,-ասաց Անանյանը:

Նա տեղեկացրեց, որ երկու օր անց ՊԵԿ-ում այդ թեմայով քննարկում է տեղի ունենալու, որպեսզի տեսնեն, թե ինչպես կարելի է իրականացնել վարչապետի հանձնարարականը:

Ինչ վերաբերում է Պեկ-ում պարգևավճարներին, Անանյանն ասաց, որ ՊԵԿ-ում 2019 թվականին պարգեւավճարներն ավելացել են 800 մլն դրամով, միևնույն ժամանակ 967 հոգի ազատվել է աշխատանքից՝ մի մասը սեփական դիմումի համաձայն, մի մասը՝ կրճատումների արդյունքում:

Դիտարկմանը, թե այդ ինչպես է պատահել, որ 2019 թվականին ՊԵԿ-ում պարգեւավճարները կազմել են 5.8 մլրդ դրամ՝ նախորդ տարվա 5 մլրդ դրամի փոխարեն, սակայն աղմուկն ավելի քիչ , Դավիթ Անանյանն ասաց, որ դա նաեւ պատճառով է, որ հանրությունը մի փոքր հասկացել է կառավարության որդեգրած քաղաքականությունը։

«Մենք հանրության հետ երկխոսելու եւ մարդկանց որոշակի մտքեր հայտնելու անհրաժեշտություն ունեինք։ Հանրության շրջանում բարձր եկամուտ ունեցողի նկատմամբ կա որոշակի վերապահում. դա լավ ճանապարհ չի, եւ լավ տեղ չի տանում։ Մենք կարողացանք հասնել նրան, որ եթե ուզում ենք ունենալ պրոֆեսիոնալ անձնակազմ, ապա գոնե մասնավոր հատվածի միեւնույն մասնագիտության մեջ որոշակի ֆինանսական մրցակցություն պետք է կարողանանք ապահովել»,- ասաց ՊԵԿ նախագահը։

Դավիթ Անանյանն ասաց, որ խնդիր է դրվել որոշակի արժանապատիվ վաստակի չափ ապահովել աշխատակիցների համար, որպեսզի որակյալ մասնագետների արտահոսք չլինի. «Կադրերի արտահոսք եղել է, 2019 թվականին ՊԵԿ-ից 967 հոգի ազատվել է աշխատանքից, մի մասը՝ սեփական դիմումի համաձայն, մի մասը՝ կրճատումների արդյունքում։ Հեն ենք ընդունել 600-ից մի փոքր պակաս աշխատակից։ Մոտ 360-380 ահստիք օպտիմիզացիա ենք արել, բայց նաեւ սերնդափոխություն ենք կարողացել անել: Բայց դրա հետ մեկտեղ, ցավոք, ունեցել ենք փորձառու աշխատողներից ազատման դիմում, որոնք աշխատանքի են անցել մասնավոր հատվածում»:

«Այն անձը, որ որոշումներ կայացնելու շրջանակ ունի, նա պետք է ունենա այնպիսի վաստակ, որ միայն մտածի ճիշտ որոշումներ կայացնելու մասին: Որպեսզի մարդը որեւէ կոռուպցիոն մեխանիզմի մասին չմտածի, էլ ուր մնաց չթաթախվի, նա պետք է ունենք միջին վիճակագրական արժեքային համակարգ եւ երոշակի վաստակի չափ, որը կօժանդակի, որ այդ արժեքային համակարգը չտուժի: Մենք չպետք է այնքան մեծ եկամուտներ վաստակենք, որ լինի սոցիալական բում, բայց պետք է ունենանք գոնե այնպիսի եկամուտների համակարգ, որ մեր մասնագետները լինեն մրցունակ»,-ասաց Անանյանը:

ՊԵԿ նախագահն անդրադարձավ նաև 2019 թվականի բյուջեի եկամուտներին, ասելով, որ դրանք ճշգրտված ցուցանիշի նկատմամբ թերակատարվել են, սակայն գերակատարվել նախնական ցուցանիշի նկատմամբ. «Երբ տարվա ընթացքում ասում ենք, որ բյուջեի եկամուտները գերակատարվելու հստակ ազդակներ կան, կառավարությունը որոշում է փոփոխել իր ծրագրային ցուցանիշը՝ իր որոշումներով: Մոտ 80-85 մլրդ դրամով վերանայվել է եկամուտների պլանը:

Այսպիսի մի սցենար, ԱԺ-ում կառավարությունը ենթադրենք հայտարարելու է, որ եկամուտների կատարման ճշտված պլանի առումով փաստացի կատարողականը 98 տոկոս է, ծախսերի փաստացի պլանը 90 տոկոս է, որի արդյունքում չկա որեւէ ծախս, որ կատարված չլինի միջոցների բացակայության պատճառով: Հետեւաբար, կարեւոր չի՝ մենք 100 տոկոսով կատարեցինք, թե 120 տոկոսով, կարեւորն այն է, որ կառավարությունն ինքն է իր կամքով ստանձնել որոշակի ծախսեր կատարելու պարտավորություն:

Մենք ստանձնել ենք 56 մլրդ հին պարտք վերադարձնելու պարտականություն, որը մեր ցուցանիշը 43 մլրդ դրամով նվազեցրել է: Եթե այդ 43 մլրդ դրամը հաշվի չառնենք, մենք ցանկացած ճշտված ցուցանիշ գերակատարել ենք: Հիմա մենք պետք է հասարակության հետ գանք հայտարարի՝ կարեւորն այն է, որ հպարտ կեցվածք ընդունենք ու հայտարարենք, որ մեր կատարողականը եղել է 104 մլրդ դրա՞մ, թե՞ իրական տնտեսությանը վերադարձնենք թիվ, որը վերարտադրություն կսկսի, կապիտալ ծախսեր կանի եւ այլն»,-ասաց Անանյանը:

Նա հավելեց. «Եթե դուք համեմատություն անեք ոչ թե 1, 507 տրլն դրամի հետ, այլ 1,464 տրլն դրամի հետ ու ասեք, որ թերակատարել ենք եկամուտները, ես մեծ հաճույքով կհամաձայնեմ ձեզ հետ, որովհետեւ ավելի լավ է «թերակատարում» ունենանք, բայց տնտեսությանն իրական օգուտ տանք»: