Ողբերգական վրաերթի հետևանքով տուժած հավաքարարի վիճակը միջին ծանրության է
Երեւանում հունվարի 11-ին տեղի ունեցած ողբերգական վրաերթից մահացած 57-ամյա Բասե Մամոյանը, որը քաղաքապետարանի սանմաքրման ընկերությունում աշխատում էր որպես հավաքարար, հիվանդ ամուսին եւ մի քանի մանկահասակ թոռներ ունի, որոնց խնամքի մի մասն իր վրա էր։
Այս մասին Operativ.am-ին հայտնեցին Գեղանիստի գյուղապետարանից, որտեղ ապրում էր կինը ընտանիքի հետ։
«Ամուսինը հիվանդ է, կարգային թոշակառու է։ Դոմիկում էին մնում, նոր են տուն կառուցել՝ կլինի 4 տարի։ Իրենց համար աշխատել են, ստեղծել, տանջված ընտանիք է։ Գիտենք, որ «Մալաթիա» շուկայում մաքրություն էր անում»,– տեղեկացրին գյուղապետարանից։
Դեպքի ժամանակ տուժած մյուս կինը՝ 66-ամյա Ասյա Սաֆոյանը, «Աստղիկ» ԲԿ–ում է, վիճակը միջին ծանրության է, կյանքին վտանգ չի սպառնում։ Հիվանդանոցից Operativ-ին հայտնեցին, որ նա ստացել է կողերի կոտրվածք։
Ավելի վաղ հայտնել էինք, որ հունվարի 11-ին Ժամը 00:20-ի սահմանում Վայոց Ձորի մարզի բնակիչ, 27-ամյա Հարություն Հ.-ն իր վարած ВАЗ-21124 մակնիշի 35 RM 072 համարանաիշի ավտոմեքենայով բախվել է Երեւանի բնակիչ, 66-ամյա Վլադիմիր Ղ.-ի կողմից շահագործվող КАМАЗ 432535 մակնիշի 862 LՍ 01 համարանիշի ավտոմեքենային: Վթարի հետեւանքով վրաերթի են ենթարկվել Արարատի մարզի Գեղանիստ գյուղի բնակիչ, 57-ամյա Բասե Մամոյանը եւ Երեւանի բնակիչ, 66-ամյա Ասյա Սաֆոյանը: Կանայք աշխատում էին Եեւանի քաղաքապետարանի սանմաքրման ընկերությունում որպես հավաքարարներ։