Աբխազիայի ընդդիմությունը ԿԸՀ ղեկավարին է հանձնել նախագահական ընտրությունների չեղարկման դատարանի որոշումը
Աբխազիայի խորհրդարանի ընդդիմադիր պատգամավորները ԿԸՀ ղեկավար Թամազ Գոգիային են հանձնել 2019 թվականի սեպտեմբերին տեղի ունեցած նախագահական ընտրությունների չեղարկման մասին դատարանի որոշումը, տեղեկացնում է ՌԻԱ «Նովոստի»-ի թղթակիցը, որը ներկա է իրադարձություններին։
Վեց մարդուց բաղկացած պատգամավորների խումբը եկել է ԿԸՀ Աբխազիայի նախագահի նախկին թեկնածու Ալխաս Կվիցինիայի հետ։ Գոգիան հարցրել է, թե ինչու են պատգամավորները անձամբ իր մոտ եկել։ «Որպեսզի արագացնենք գործընթացը»,- պատասխանել է Կվիցինիան։
Դրանից հետո ընդդիմադիրները ԿԸՀ ղեկավարի հետ կարճ հանդիպում են ունեցել, որի արդյունքներով տեղեկացրել են Աբխազիայի նախագահի նոր ընտրությունների ժամկետի մասին։ «Աբխազիայի նախագահի նոր ընտրությունների օրը կորոշվի հունվարի 13-ից ոչ ուշ»,- ասել է Կվիցինիան։
Հինգշաբթի բողոքողները, որոնք պահանջում են նախագահի հրաժարականը, ներխուժել են Աբխազիայի ղեկավարի աշխատակազմ։ Այդ ընթացքում շենքում նախագահի գրասենյակի աշխատակիցներ չէին մնացել։ Անվտանգության խորհրդի արտահերթ նիստից հետո նախագահ Ռաուլ Խաջիմբան ասել է, որ ուժային կառույցները բերվել են ուժեղացված ռեժիմի, իսկ անհրաժեշտության դեպքում նա հանրապետությունում արտակարգ դրություն կմտցնի։
Աբխազիայի խորհրդարանը խորհուրդ է տվել Խաջիմբային հեռանալ նախագահի պաշտոնից։ Պատգամավորների ընդունած որոշման նախագծում ասվում է, որ հանրապետությունում լարված հասարակական-քաղաքական իրավիճակի հետ կապված եւ խուսափելու համար հետագա ապակայունացումից՝ խորհրդարանը դիմում է նախագահին հրաժարական տալու առաջարկով։ Փաստաթղթի օգտին քվեարկել է 19 պատգամավոր, դեմ՝ 4, ձեռնպահ՝ 1։
Ուրբաթ Աբխազիայի Գերագույն դատարանը որոշում էր կայացրել ընդդիմադիր Ալխաս Կվիցինիայի առաջին ատյանի դատարանի որոշման դեմ բողոքի վերաբերյալ, որն ուժի մեջ էր թողնում նախագահի ընտրությունների ու երկրորդ ընտրությունների նշանակման արդյունքները։