Իրանցի բարձրաստիճան պաշոոնյայի սպանությունը նոր շերտ է ավելացրել իրողություններին և հետագա զարգացումները սրանով են էապես պայմանավորված լինելու (Տեսանյութ)
Վերջին օրերին Աշխարհն ուշի ուշով հետևում էր ԱՄՆ – Իրան դիմակայությանը: Ինչպիսին կլինեն հետագա զարգացումները, որոնք են Հայաստանին առնչվող ռիսկերը. թեմայի շուրջ «Առաջին լրատվական»-ի հետ քննարկման ընթացքում այս և մի շարք այլ հարցերի անդրադարձան Հայ կառուցողական կուսակցության նախագահ Անդրիաս Ղուկասյանը, վերլուծաբաններ Հակոբ Բադալյանը և Գոռ Մադոյանը:
Կողմերը խուսափեցին առճակատումից, բայց դա շի նշանակում, որ կոնֆլիկտը հանգուցալուծվել է կամ սկսվել է խաղաղ ժամանակաշրջան: Ի՞նչ է հաջորդելու այս ամենին: Հակոբ Բադալյանի կարծիքով՝ այնքան էլ իրատեսական չէ խոսել Մերձավոր Արևելքում մոտալուտ խաղաղ ժամանակաշրջանի մասին այնքան ժամանակ, քանի դեռ այնտեղ թեժ ռեժիմով ընթանում են նոր աշխարհակարգային հարաբերությունների մեխանիզմների որոնումները, և զարգացումները խտացված են այդ տարածաշրջանում…
«Իրանցի բարձրաստիճան պաշոոնյայի սպանությունը նոր շերտ է ավելացրել իրողություններին և հետագա զարգացումները սրանով են էապես պայմանավորված լինելու: Զարգացումները կարող են իրենց ազդեցությունը թողնել Իրանի հետագա վարքագծի վրա: Ստեղծվում է նոր իրավիճակ, Իրանը ստացել է առավել ակտիվ լինելու նախադրյալներ՝ առերևույթ ստացած հարվածին զուգահեռ: Կրծում եմ այդ ակտիվությունը Իրանը էապես օգտագործելու է ոչ այնքան ԱՄՆ-ի, որքան խորքային առումով տարածաշրջանային խաղի մյուս մասնակիցների՝ Թուրքիայի և Ռուսաստանի դեմ: Տարածաշրջանը թևակոխել է շրջադարձային նոր փուլ: ԱՄՆ- Իրան դիմակայությունը դեռ երկար կպահպանվի»,- նշեց վերլուծաբանը:
Անդրիաս Ղուկասյանի դիտարկմամբ՝ վերջին տարիներին ԱՄՆ-ի քաղաքականությունը տարածաշրջանում աննախադեպ է. «ԱՄՆ-ը գերտերություն է, բայց Թրամփի օրոք այս տարածաշրջանում իջել է Իսրայելի շահերը սպասարկելու մակարդակին… Աննախադեպ է նաև այն, որ ԱՄՆ Կոնգրեսը բանաձև է ներկայացրել և արգելում է պատերզամական գործողություն իրականացնել Իրանի դեմ: Այս պատերազմի պատվիրատուն կարող էր լինել միայն Իսրայելը, ԱՄՆ-ը և Իրանը պատերազմի կարիքը չունեն»:
Գոռ Մադոյանի դիտարկմամբ՝ տեղի ունեցածը տեղավորվում է Թրամփի խոստումների շրջանակում. «Իր խոստումների համաձայն՝ նա փորձում է կարգավորել մեծ կայսրության փոքր հարցերը տարածաշրջանում»:
Մանրամասն՝ տեսանյութում: