Ցուցարարները կոտրել են Աբխազիայի նախագահի աշխատակազմի շենքի դռները

Սուխումի կենտրոնում ցուցարարները կոտրել են Աբխազիայի նախագահի աշխատակազմի շենքի առաջին հարկի դռները, իրադարձությունների վայրից փոխանցում է ՏԱՍՍ-ի թղթակիցը:

Շենքի ներսում հավաքվել է մի քանի տասնյակ մարդ: Ավելի վաղ հաղորդվել էր, որ ցուցարարները ներխուժել են աշխատակազմի շենք:

Սուխումում հինգշաբթի պետք է անցկացվեր ընդդիմության ակցիան, որը համաձայն չէ 2019 թվականի սեպտեմբերին տեղի ունեցած Աբխազիայի նախագահի ընտրությունների արդյունքների հետ:

Ակցիայի մասնակիցները նախապես ծրագրել էին հավաքվել դատարանի շենքի մոտ, որտեղ այսօր Աբխազիայի Գերագույն դատարանը վերսկսել էր «Ամցխարա» կուսակցությունից նախագահի ընդդիմադիր թեկնածու Ալխաս Կվիցինիայի՝ առաջին ատյանի դատարանի դեմ հայցի քննությունը, որը հանրապետության ղեկավարի ընտրությունների արդյունքները վավերական էր ճանաչել:

Ցուցարարները, սակայն, ավելի ուշ անցել էին նախագահի աշխատակազմի շենք, որոնց միացել էին երկրի այլ բնակիչներ: Ընդդիմության ներկայացուցիչները հայտարարում են, որ երկրորդ ակցիայի կազմակերպիչները չեն:

Նախագահի աշխատակազմի շենքի մոտ հանրահավաքի կազմակերպիչ Ախրա Ավիձբան հայտնել է, որ ակցիան կապված է այն փաստի հետ, որ օրերս Սուխումում դատարանի կողմից՝ 2019 թվականի նոյեմբերին 3 մարդու սպանության համար կալանավորվածներից մեկն իբր Աբխազիայի նախագահի թիկնազորի աշխատակից է:

Հիշեցնենք, որ նոյեմբերի 22-ին Սուխումում դիմակավորված անհայտ անձինք ավտոմեքենայից կրակահերթեր էին արձակել «Սան Ռեմո» ռեստորանի ամառային ծածկապատշգամբի ուղղությամբ: Այդ ժամանակ զոհվել էին երկու քրեական հեղինակություն՝ Ալխաս Ավիձբան եւ Աստամուր Շամբան: Մատուցողուհի Դոմինիկա Ակիրտավան, որը մոտեցել էր սեղանին, գլխին հրազենային վիրավորում էր ստացել եւ ավելի ուշ մահացել հիվանդանոցում: Եվս երեք մարդ վիրավորվել էր:

Սուխումի դատախազությունը քրեական գործ էր հարուցել արտակարգ միջադեպի փաստով: 2020 թվականի հունվարի 6-ին Սուխումի քաղաքային դատարանը կալանավորել էր գործի երեք ֆիգուրանտներին՝ Ասլան Բլաբային, Դաթո Ախալաիին եւ նրա եղբորը՝ Դեմուրին: Եվս մեկ կասկածյալի՝ Էրիկ Չկադուայի նկատմամբ հետախուզում է հայտարարվել: