Հայաստանը կմիանա երգիչների, դերասանների իրավունքներին վերաբերող «Տեսալսողական կատարումների մասին» Պեկինի պայմանագրին

Կառավարությունն իր այսօրվա՝ հունվարի 9-ի նիստում հավանություն տվեց 2012-ի հունիսի 24-ին ընդունված «Տեսալսողական կատարումների մասին» Պեկինի պայմանագիրն վավերացնելու մասին» ՀՀ օրենքի նախագծի վերաբերյալ Կառավարության օրենսդրական նախաձեռնությանը:

Օրենքի նախագիծը կներկայացվի ՍԴ՝ Սահմանադրությանը համապատասխանությունը որոշելու նպատակով:

Որոշման հիմնավորման մեջ նշվում է, որ պայմանագիրը վերաբերում է կատարողների՝ տեսալսողական կատարումների նկատմամբ իրավունքների պահպանությանն ու պաշտպանությանը:

Պայմանագիրն արդիականացնում է երգիչների, երաժիշտների, պարողների եւ դերասանների իրավունքները տեսալսողական կատարումների նկատմամբ՝ լրացնելով 1961թ-ին Հռոմում ընդունված կատարողների, հնչյունագիր արտադրողների եւ հեռարձակող կազմակերպությունների իրավունքների պաշտպանության մասին Հռոմի կոնվենցիան, ինչպես նաեւ Մտավոր սեփականության համաշխարհային կազմակերպության  (ՄՍՀԿ) Կատարողների եւ հնչյունագիր արտադրողների մասին պայմանագիրը: 

Տեսալսողական կատարումների մասին Պեկինի պայմանագիրը կարգավորում է դերասանների կատարումները, որոնք հաղորդվում են կինեմատոգրաֆիայի եւ հեռուստատեսության միջոցով,  ինչպես նաեւ երաժշտական կատարումները, երբ դրանք ամրագրված են տեսասկավառակների վրա կամ որեւէ այլ տեսալսողական հարթակում:    

Պեկինյան պայմանագրի կնքման անհրաժեշտությունը պայմանավորված է հատկապես նոր թվային տեխնոլոգիաների զարգացմամբ եւ կատարողներին ավելի լայն իրավական պաշտպանության տրամադրմամբ:

Տեսալսողական ամրագրումներում ամրագրված կատարումների համար Պայմանագրում նախատեսված են վերարտադրության, տարածման, վարձույթով տալու եւ մատչելի դարձնելու գույքային իրավունքները, իսկ չամրագրվածկատարումների համար՝ դրանց ամրագրման, հեռարձակման եւ հանրությանը հաղորդման իրավունքները: 

Պայմանագրին  միացած պետությունների համար.

1. կստեղծվի նպաստավոր պայմաններ ազգային մշակույթի, բանահյուսության եւ մշակութային արժեքների ներկայացման եւ փոխանակման համար:

2. մեկ անդամ պետությունը լիարժեք պահպանություն կապահովի մյուս անդամ պետության քաղաքացուն, դրանով իսկ երաշխավորելով տեղական արտադրողներին եւ կատարողներին օգտվելու իրենց գույքային իրավունքներից, երբ նրանց ֆիլմերը, հեռուստասերիալներն ու այլ տեսալսողական ստեղծագործությունները կցուցադրվեն կամ հասանելի կլինեն այլ երկրներում: