Հրայր Թովմասյանի սանիկի կալանքի որոշումը կհրապարակվի վաղը
ՍԴ նախագահ Հրայր Թովմասյանի սանիկի՝ Նորայր Փանոսյանի նկատմամբ որպես խափանման միջոց կալանավորումն ընտրելու մասին քննիչի միջնորդության որոշումը կհրապարակվի հունվարի 9-ին։ Այս մասին այսօր՝ հունվարի 8-ին, լրագրողների հետ զրույցում հայտնեց Փանոսյանի պաշտպան Տիգրան Աթանեսյանը։
Պաշտպանն ասաց, որ Փանոսյանին առաջադրված մեղադրանքն անհիմն է, նրա նկատմամբ ակնհայտ հետապնդում է իրականացվում.
«Խայտառակ մեղադրանք է։ Նորայրին փորձում են դատել զուտ նրա համար, որ նա Հրայր Թովմասյանի սանիկն է, դա արվում է Հրայր Թովմասյանի վրա ազդեցություն ունենալու նպատակով։
Աթանեսյանն ասաց, եթե Փանոսյանը կալանավորվի, ապա պատրաստվում է կրկին բողոքարկել այդ որոշման դեմ.
«Բոլոր դեպքերում մենք գրավի միջնորդություն ներկայացնում ենք, անկախ նրանից՝ հիմնավոր կասկած չկա կամ կալանավորման հիմքեր չկան։ Մենք անկախ դասախոսներ չենք, ամեն դեպքում ամեն ինչ պետք է անենք՝ ի օգուտ մեր պաշտպանյալի։ Եթե գրա՞վն է վերջին հույսը, ապա մենք գրավը միջնորդում ենք։ Այո, մենք մեզ հակասում ենք շատ դեպքերում, երբ ասում ենք՝ հիմնավոր կասկած չկա, բայց նաեւ գրավ ենք պահանջում։ Ինձ մեկ է, կբավարարի՞, թե՞ ոչ։ Մեղադրանքն օդ է, մի օր պայթելու է։ Եթե բավարարի կմնա բավարարողի խղճի վրա»։
Հարցին՝ ինչո՞ւ է պաշտպանը առաջադրված մեղադրանքը համարում ծիծաղելի, Աթանեսյանը պատասխանեց.
«Մեծ հաճույքով կմանրամասնեի, թե ինչու է մեղադրանքը ծիծաղելի, սակայն նախաքննության փուլում է, ասում է՝ գնացել եմ մի տեղ, չգիտեմ՝ որտեղ, տեսել եմ մեկին, չգիտեմ՝ ում, այդ անձը չգիտեմ՝ ինչ է արել, արդյունքում ինչ-որ մեկը տուժել է։ Ի՞նչ արեց Նորայրը, ոչ ոք չհասկացան»։
Հիշեցնենք, որ Նորայր Փանոսյանին առաջադրված մեղադրանքը լրացվել էր՝ նրան մեղադրանք է առաջադրվել ՀՀՔՕ-ի 308-րդ հոդվածի 2-րդ մասով, այն է՝ պաշտոնեական լիազորությունները չարաշահելը, որն անզգուշությամբ առաջացրել է ծանր հետեւանքներ եւ կրկին կալանավորելու միջնորդություն ներկայացվել։