Ֆրանսիացի գործարարը վրեժ է լուծել ընկերությունից իրեն աշխատանքից հեռացնելու համար՝ հափշտակելով 1 մլն եվրո․ ԶԼՄ-ներ

Ֆրանսիացի ձեռնարկատերը, թվային տեխնոլոգիաների ստարթափ ընկերության հիմնադիրներից մեկը հափշտակել է ընկերություից 1.1 մլն եվրո՝ այդկերպ վրեժ լուծելով իրեն աշխատանքից հեռացնելու համար, հաղորդում է ՏԱՍՍ-ը՝ հղում անելով Le Parisien-ին։

Ընկերությունը ստեղծվել է 2013 թվականին փարիզյան մերձակայքում եւ հաջողությամբ գործել՝ ունենալով մեծ շահույթ։ Սակայն աստիճանաբար դրա ղեկավարության շրջանում ծագել է սուր կոնֆլիկտ ընկերության զարգացման ռազմավարության շուրջ հակասական հայացքների պատճառով։ Կոնֆլիկտի արդյունքում էլեկտրոնիկայի եւ թվային տեխնոլոգիաների մասնագետը հեռացել էր երկրից՝ որոշելով աշխատանքի ընդունվել արտասահմանում։

Գործելով Ֆրանսիայի սահմաններից դուրս՝ նա հափշտակել է ընկերությունից 182 բիթքոին, ինչը կազմում է 1.1 մլն եվրո։ Դա ժամանակակից Ֆրանսիայի պատմության մեջ երրորդ դեպքն է այդ ծավալի կրիպտոարժույթ հափշտակելու առումով։ Ապօրինի գործողություններ էին անցկացվել փորձագետի կողմից 2018 թվականի դեկտեմբերին եւ 2019 թվականի հունվարին։

Մասնագետը քաջ ծանոթ էին ընկերության էլեկտրոնային համակարգի առանձնահատկությունները։ Նա մի քանի անգամ է դրա հաշիվներից դուրս գրել կրիպտոարժեքը, ամեն անգամ այնքան գումար, որի դեպքում ահազանգման համակարգը չի գործում։

Հափշտակման առնչությամբ ընկերության ղեկավարությունը բողոք էր ներկայացրել Փարիզի դատախազության կիբերհանցագործությունների դեմ պայքարի բաժին։ Մի քանի ամիս անց մասնագետները պարզել էին, թե որ էլեկտրոնային դրամապանակում են տեղափոխված հափշտակված միջոցները։ Հետագայում հաջողվել էր պարզել նաեւ դրա սեփականատիրոջը։ 37-ամյա տղամարդը ձերբակալվել էր դեկտեմբերի 22-ին Կալվադոսի դեպարտամենտում, ուր վերադարձել էր արտերկրից։ Դատախազությունը նրան մեղադրանք է առաջադրել հանցավոր խմբավորման կազմում դրամական միջոցների հափշտակման, փողերի լվացման, տվյալների ավտոմատ մշակման համակարգում անօրինական մուտք գործելու եւ հանցավոր մանիպուլյացիաներ կատարելու համար։ Մեղադրյալը գտնվում է դատական հսկողության ներքո։ Փարիզի դատախազությունը բողոքարկել է այդ որոշումը՝ պահանջելով նախնական կալանքի ենթարկել մեղադրյալին։