Նեթանյահուն հայտարարել է, որ հաղթել է «Լիկուդի» նախագահի ընտրություններում
Իսրայելի վարչապետ Բենիամին Նեթանյահուն հայտարարել է «Լիկուդ» կուսակցության ներքին ընտրություններում իր հաղթանակի մասին, տեղեկացնում է ՌԻԱ «Նովոստի»-ն։
«Մեծ հաղթանակ։ Շնորհակալություն ընկերներին եւ «Լիկուդի» անդամներին վստահության, աջակցության եւ սիրո համար։ Աստծո եւ ձեր օգնությամբ ես «Լիկուդը» կտանեմ դեպի մեծ հաղթանակ գալիք ընտրություններում եւ կշարունակեմ Իսրայելի պետությունը տանել աննախադեպ ձեռքբերումների»,- գրել է Նեթանյահուն Թվիթերում։
«Լիկուդում» փրայմերիզի ընտրատեղամասերը փակվել են ժամը 23.00-ին, ընտրողների մասնակցությունը գերազանցել է 49 տոկոսը։ Իսրայելական հեռուստատեսության 13-րդ ալիքի տվյալներով՝ ձայների ավելի քան 70 տոկոսը տրվել է Նեթանյահուին։
Նեթանյահուի հիմնական մրցակիցը ներքին գործերի նախկին նախարար Գիդեոն Սաարն էր։ Պաշտոնական արդյունքները շտաբում խոստանում են ամփոփել ուրբաթ առավոտյան։
«Լիկուդի» նախագահի պաշտոնի փրայմերիզը Նեթանյահուի համար հարկադրյալ միջոցառում էր, քանի որ կուսակցական էլիտայի ներսում հնչում էին ձայներ՝ կուսակցության ղեկավարությունը փոխելու պահանջով, որը երկու անգամ չէր կարողացել կառավարություն ձեւավորել ընտրությունների արդյունքներով։ Նեթանյահուի՝ կառավարություն ձեւավորելու երկու իրար հաջորդող անհաջողությունները դարձան Սաարի ընտրարշավի գլխավոր փաստարկը, որը խոստանում էր հաղթանակի դեպքում Նեթանյահուին առաջադրել նախագահի պաշտոնում։
Միեւնույն ժամանակ, Նեթանյահուի կողմնակիցներին չի շփոթեցնում այն, որ Իսրայելի պատմության մեջ առաջին անգամ գործող վարչապետի դեմ կոռուպցիայի եւ հանրային վստհությունը չարաշահելու մեղադրանքներ են առաջադրվել։
Ավելի վաղ, Կնեսետում երկու արտահերթ ընտրությունների ձախողումից հետո (ապրիլին եւ սեպտեմբերին), երբ քվեարկության արդյունքներով ոչ մի քաղաքական ուժ չկարողացավ մեծամասնության կոալիցիոն կառավարություն ձեւավորել, Կնեսետը քվեարկել էր ինքնալուծարման օգտին։ Հաջորդ ընտրությունները նշանակված են 2020 թվականի մարտի 2-ին։
Իսրայելի կառավարությունը գործում է անցումայինի կարգավիճակով արդեն մոտ մեկ տարի։ Իշխանության մարմինները գործում են սահմանափակ լիազորությունների ռեժիմով։ Խորհրդարանը չի կարող ընդունել բյուջեն։ Չնայած քաղաքական գործիչների լավատեսական հայտարարություններին՝ կուսակցությունների դիրքորոշումները սկզբունքորեն չեն փոխվել, նշանակում է՝ առայժմ չկան պատճառներ հուսալու, որ մարտին նշանակված երրորդ անընդմեջ ընտրությունները երկիրը դուրս կբերեն քաղաքական փակուղուց։