Վրաստանի նախագահն առաջարկել է ՌԴ-ի հետ երկխոսություն վարել «նորմանդական ձևաչափի» օրինակով
Թբիլիսին կարող էր Մոսկվայի հետ երկխոսություն վարել «նորմանդական ձեւաչափի» օրինակով։ Այս մասին ասել է Վրաստանի նախագահ Սալոմե Զուրաբիշվիլին Վրաստանի Հանրային հեռուստատեսության Առաջին ալիքի հարցազրույցում։
«Մենք կարող էինք դիտարկել (բանակցությունների անցկացման հնարավորությունը) «նորմանդական ձեւաչափի» օրինակով, որտեղ Վրաստանն իր գործընկերների հետ ներկայացված կլիներ (Ռուսաստանի հետ) բանակցություններում, քանի որ մենք միայնակ բանակցություններ վարելու ուժ չունենք։ Որպեսզի բանակցություններն արդյունք ունենան, պետք է հավասար դիրքում լինել։ Մեզ աջակցություն է պետք»,- ասել է հանրապետության նախագահը՝ պատասխանելով հարցին, թե պետք է օգտագործել բոլոր ուղիները՝ Մոսկվայի եւ Թբիլիսիի հարաբերություններում ստեղծված վիճակը «կոտրելու» համար։ «Բոլորը պետք է լավ հիշեն. ոչ երկխոսությունը, ոչ բանակցությունները չեն նշանակում որեւէ զիջում»,- ընդգծել է նա։
Զուրաբիշվիլին միաժամանակ կարծում է, որ Անդրկովկասում կայունության եւ անվտանգության վերաբերյալ Ժնեւյան բանավեճերի ձեւաչափը, ինչպես նաեւ ՌԴ-ի հետ հարաբերությունների կարգավորման գծով Վրաստանի վարչապետի հատուկ ներկայացուցիչ Զուրաբ Աբաշիձեի կանոնավոր հանդիպումները Դաշնության խորհրդի անդամ Գրիգորի Կարասինի հետ պետք է պահպանել։