Հունաստանում հնագետները հայտնաբերել են ոսկով ծածկված հնագույն 2 դամբարան, որոնք պարունակում են մեծ թվով իրեր եւ ոսկուց ու կիսաթանկարժեք քարերից զարդեր

Հունաստանում հնագետները հայտնաբերել են ոսկով ծածկված հնագույն 2 դամբարան: Դամբարանները պարունակում են մեծ թվով իրեր եւ ոսկուց ու կիսաթանկարժեք քարերից զարդեր: Նկարագրությունը ներկայացված է Ցինցինատիի համալսարանի կայքում, հայտնում է «ՌԻԱ Նովոստի»-ն:

2018 թվականին հայտնագործությունը կատարել են Ցինցինատիի համալսարանից ամերիկացի հնագետներ Ջեք Դեւիսը եւ Շերոն Սթոքերը՝ Հունաստանի հարավում Փիլոս քաղաքի շրջանում պեղումների ժամանակ:

Դամբարանները եւս մեկ՝ ճարտարապետությամբ նման ընտանեկան գերեզմանատան կողքին են, որ թվագրվում է մ.թ.ա. 16-րդ դարով, ինչպես նաեւ թրով տղամարդու գերեզմանոցի մոտ, որը հայտնաբերվել է 2015 թվականին եւ առասպելական թռչունի պատվին կոչվել է «արծվառյուծների ռազմիկի» գերեզման, որը փորագրվել է գերեզմանում հայտնաբերված փղոսկրից հուշատախտակի վրա:

Չնայած «արծվառյուծների ռազմիկի» գերեզմանը մինոյան մշակույթի մեծ թվով իրեր է պարունակել, գիտնականները համարել են, որ այդ արտեֆակտները բերվել են Կրետեից, եւ շարունակել են այն բանի ապացույցների որոնումները, որ մ.թ.ա. 17-13-րդ դարերում Փիլոսը եղել է միքենյան մշակույթի կենտրոններից մեկը: Չէ՞ որ հենց Փիլոսում է գտնվում, այսպես կոչված, Նեստորի պալատը, որը միքենյան շրջանի ամենախոշոր եւ լավագույն կերպով պահպանված կառույցն է, որի մասին հիշատակվում է Հոմերոսի «Իլիականում» եւ «Ոդիսականում»: Մ.թ.ա. 1600 եւ 1500 թվականների միջեւ ընած ժամանակաշրջանը հնագետների համար հետաքրքրություն է ներկայացնում, քանի որ այդ շրջանին վերագրվող միքենյան քաղաքակրթության քաղաքները չեն պահպանվել:

Չնայած հայտնաբերված երկու ընտանեկան դամբարանները հնադարում մասնակի կողոպտվել էին, գիտնականները դրանց մեջ հայտնաբերել են հազարավոր ոսկե փայլաթիթեղի կտորներ եւ ոսկե թիթեղների մնացորդներ, որոնցով ծածկել են կառույցի պատերը եւ հատակը: