Քննարկվել են ՄԱԿ-ի կայուն զարգացման նպատակների իրագործման եւ ՀՀ-ի և Ղրղզստանի կամավոր զեկույցների պատրաստման հարցերը

ՀՀ էկոնոմիկայի նախարարի տեղակալ Ավագ Ավանեսյանն ընդունել է Ղրղզստանի Հանրապետության էկոնոմիկայի նախարարի տեղակալ Ավթանդիլ Ալիբաեւի գլխավորած պատվիրակությանը, որի կազմում էին Ղրղզստանի ազգային վիճակագրական կոմիտեի փոխնախագահը, երկրի նախագահի գրասենյակի, կառավարության աշխատակազմի եւ Ղրղզստանում ՄԱԿ-ի գրասենյակի աշխատակիցները։

Ղրղզստանի պատվիրակությունը Երեւան է ժամանել՝ մասնակցելու ՄԱԿ-ի հայաստանյան գրասենյակի կողմից կազմակերպված եւ դեկտեմբերի 2-ից 5-ն ընթացող աշխատաժողովին, որը նվիրված է ՄԱԿ-ի կայուն զարգացման նպատակներին եւ կամավոր Ազգային զեկույց ներկայացնելու գործընթացին եւ նախատեսված է Հայաստանի ու Ղրղզստանի համապատասխան գերատեսչությունների ներկայացուցիչների համար։

Ավթանդիլ Ալիբաեւը շնորհակալություն է հայտնել հանդիպման համար եւ նշել, որ պատվիրակությունը ցանկանում է ծանոթանալ ՄԱԿ-ի կայուն զարգացման նպատակների իրագործման եւ կամավոր Ազգային զեկույցի պատրաստման գործընթացում Հայաստանի փորձին եւ ներկայացնել իրենցը։ Ղրղզստանի էկոնոմիկայի փոխնախարարը հույս է հայտնել, որ հանդիպումը երկուստեք օգտակար եւ արդյունավետ կլինի։

Ավագ Ավանեսյանը հյուրերին ծանոթացրել է նշված ուղղությամբ Հայաստանում իրականացվող աշխատանքներին, գործընթացի համակարգման կառուցվածքին, էկոնոմիկայի նախարարության գործողություններին։ Այնուհետեւ նա պատասխանել է հյուրերին հետաքրքրող հարցերին, որոնք, մասնավորապես, վերաբերել են գերակայությունների ընտրությանը, մոնիտորինգի իրականացմանը, աշխատանքային խմբերի գործունեությանը, գործարար համայնքի եւ հասարակության տարբեր շերտերի հետ փոխգործակցությանը։

Կողմերը մտքեր են փոխանակել աշխատանքի արդյունավետության բարձրացման վերաբերյալ եւ պայմանավորվել շարունակել փոխգործակցությունը՝ տեղեկատվություն փոխանակելով գործընթացի մասին եւ կիսվելով հաջողված փորձով։