Պոլիկիստոզ ձվարանների ախտանիշ. կանայք այն «ժառանգություն» են ստանում ավելի հաճախ, քան կարծում էին գիտնականները

Պոլիկիստոզ ձվարանների ախտանիշ ունեցող կանանց աղջիկների մոտ այս պաթոլոգիան 5 անգամ ավելի հաճախ է առաջանում, քան մյուսների։ Այս մասին ասվում է նոր հետազոտությունում, որը հրապարակվել է Nature Medicine-ում։

Գիտնականները հայտնաբերել են գեներ, որոնք, գուցե, պատասխանատու են այդ հիվանդության հանդեպ ժառանգականության տրամադրվածության հարցում։ Մասնագետները կարծում են, որ կարեւոր դեր է խաղում տղամարդկային սեռական հորմոնների խտացումն արգանդում հղիության ժամանակ։

Պոլիկիստոզ ձվարանների ախտանիշը (ՊԿՁԱ) հորմոնալ խախտում է, որն առաջ է գալիս տղամարդկային սեռական հորմոնների՝ անդրոգենների բարձր արտադրման դեպքում։ Հիվանդությունն ուղեկցվում է դաշտանային ցիկլի խանգարմամբ եւ ձվարաններում կիստաների գոյացմամբ։ Որոշ դեպքերում հիվանդությունը հանգեցնում է անպտղության ձվազատման խախտման պատճառով։ ՊԿՁԱ ստույգ պատճառն առայժմ հայտնի չէ։

Շվեդ գիտնականներն ուսումնասիրել են մոտ 30 հազար կանանց եւ նրանց մայրերի բժշկական պատմությունները եւ պարզել, որ ՊԿՁԱ ունեցող կանանց աղջիկների մոտ այդ հիվանդությունը 3,4 տոկոսով ավելի շատ է հանդիպել, քան մնացած աղջիկների, որոնց մոտ ախտանիշի տարածումը եղել է 0,6 տոկոս։

Մինչ այդ գիտնականները կարծում էին, որ ՊԿՁԱ-ն ժառանգաբար փոխանցվում է 10 տոկոս դեպքերում։ Այս տվյալները ճշտելու համար գիտնականները հետազոտություններ են կատարել կենդանիների վրա։ Նրանք նաեւ պարզել են, որ ախտանիշը կարող է փոխանցվել երկու սերունդ հետո։ Համաձայն ստացված տվյալների՝ հիվանդության ժառանգման ռիսկի կարեւոր գործոն է արգանդում անդրոգենների խտությունը։

Նոր հոդվածում գիտնականները նկարագրել են 4 գեն, որոնց աննորմալ էքսպրեսիան հայտնաբերվել է ինչպես մկների, այնպես էլ ՊԿՁԱ ունեցող կանանց վրա փորձերում։ Գուցե հենց այդ գեներն են հիվանդության առաջացման պատասխանատուն։