Հայաստանի 2020 թվականի բյուջեի նախագծով նախատեսվում է 413,8 մլն դրամ հատկացնել անտառների վերականգնմանը. փոխվարչապետ
Հայաստանի կառավարությունը սկսել է շրջակա միջավայրի վրա ընդերքի օգտագործման բացասական ազդեցության նվազեցման ռազմավարության մշակումը: Այս մասին դեկտեմբերի 4-ին ԱԺ նիստում «Լուսավոր Հայաստան» խմբակցության հարցմանը կառավարության պատասխանը ներկայացնելիս ասաց փոխվարչապետ Տիգրան Ավինյանը:
Նա պատգամավորներին տեղեկացրեց, որ ընդերքի օգտագործման բացասական ազդեցության նվազեցման համար կառավարությունը նախաձեռնել է ծրագրերի շարք՝ ուղղված ոլորտի կայուն զարգացմանը: Ինչ վերաբերում է բնակչության առողջության վրա ընդերքի օգտագործման ազդեցությանը, ապա հանրապետության Առողջապահության նախարարությունը պարբերաբար իրականացնում է տվյալների համապատասխան վերլուծություն:
«Հայաստանի Առողջապահության նախարարությունը դիմել է Առողջապահության համաշխարհային կազմակերպությանը մեթոդաբանական աջակցություն ստանալու համար, ինչը թույլ կտա ավելի լավ գնահատել մարդու առողջության վրա շրջակա միջավայրի գործոնների ազդեցությունը»,- հայտնեց փոխվարչապետը:
Նա նաեւ նշեց, որ 2020 թվականի բյուջեի նախագծով նախատեսվում է 413,8 մլն դրամ հատկացնել անտառների վերականգնման աշխատանքներին:
Ավինյանը հայտնեց, որ Շրջակա միջավայրի նախարարությունը Անտառային օրենսգրքում փոփոխություններ եւ լրացումներ կատարելու օրինագիծ է մշակել, որի համաձայն՝ կվերացվի «արդյունաբերական նշանակության անտառ» հասկացությունը:
«Համապատասխան սարքավորումների կիրառմամբ անալիզի է ենթարկվել հանքարդյունաբերության թափոնների բաղադրությունը, գնահատվել դրանց ծավալը եւ զբաղեցրած տարածքը: Իրականացվում են նաեւ փակ օբյեկտների ու լքված տարածքների ուսումնասիրման եւ գույքագրման աշխատանքներ, որոնք հանքարդյունաբերական թափոններ են պարունակում: Մասնավորապես՝ ուսումնասիրվել է Ալավերդի քաղաքի մոտ գտնվող Մադանի գերեզմանոցը, ինչպես նաեւ անալիզի համար նմուշներ են վերցվել»,- նշեց փոխվարչապետը:
Ընդ որում, նրա խոսքով, հաջորդ տարվանից ընդերք օգտագործողների համար կսկսեն գործել որոշ նոր կարգավորումներ: