Բախում ոստիկանների հետ. ՀՅԴ ցուցարարները փորձել են մտնել ԿԳՄՍ նախարարություն, ոստիկաններն ուժով բերման են ենթարկել ցուցարարներին (Տեսանյութեր և լուսանկարներ)

ԿԳՄՍ նախարար Արայիկ Հարությունյանի հետ հանդիպման ակնկալիքով նախարարության շենքի մոտ հավաքված ՀՅԴ Հայաստանի երիտասարդական միության անդամներն այսօր` դեկտեմբերի 3-ին հայտարարեցին, որ ոստիկանության միջոցով իրենց փոխանցել են, որ նախարարի հետ հանդիպելու համար կա ընթացակարգ։

«Այդ ընթացակարգով պետք է գնալ, դիմել, հերթագրվել և երբ հերթը գա, եթե նախարարը հարմար գտնի, հանդիպումը տեղի կունենա։

Սակայն այն մեթոդը, որ մենք ընտրել ենք, ընդունված է ամբողջ աշխարհում և Հայաստանում էլ նախադեպեր ունեցել է։ Մենք շարունակում ենք գտնվել կառուցողական դաշտում և ինքներս կկազմակերպենք այդ հանդիպումը»,-ասաց ՀՅԴ Հայաստանի երիտասարդական միության անդամ Արգիշտի Գեւորգյանը, ինչից հետո ցուցարարները փորձեցին մտնել նախարարության շենք։

Երիտասարդները ճեղքեցին ոստիկանական պատը և փորձեցին մուտք գործել ԿԳՄՍ նախարարություն, սկսվեց հրմշտոց։ Այս պահին էլ իրավիճակը շարունակում է լարված մնալ։ Երիտասարդները չեն հրաժարվում շենք մտնելու գաղափարից։

Քիչ անց հայտնի դարձավ, որ Նախարարության մոտ մեծաթիվ ոստիկաններ են բերվել, վերջիններս ուժով ցուցարարներին փորձում էին հեռացնել շենքի մուտքի մոտից:

Ոստիկանները հայտարարեցին, որ «Հավաքի ազատությունների մասին» օրենքից չի բխում երիտասարդների գործողությունները․ «Ըստ օրենքի 30-րդ հոդվածի՝ հավաքի մասնակիցները պարտավոր են չխոչընդոտել հավաքի անցկացման վայրում գտնվող շենքերի, շինությունների ազատ մուտքն ու ելքը»։

Երիտասարդներն արձագանքեցին՝ ինչո՞ւ ոստիկանները չէին միջամտում, երբ դատարանների մուտքներն ու ելքերն էր փակվում։

Ոստիկանները պահանջեցին, որ ցուցարարներն ազատեն ԿԳՄՍՆ մուտքը, դրա համար տվեցին 5 րոպե։

Նշված ժամանակը լրանալուց հետո ոստիկանները ուժով նախարարության դիմաց նստած երիտասարդներին ուժով փորձեցին հեռացնել։ Նշենք, որ ոստիկանական մեծ թվով լրացուցիչ ուժեր են բերվել նախարարության դիմաց, նրանց թվում են նաև բազմաթիվ կարմիր բերետավորներ։ 

Ոստիկանների թիվը մի քանի անգամ գերազանցում է ցուցարարների թիվը։

Մինչեւ նախարարության դիմաց նստելը ՀՅԴ երիտասարդները առաջարկել էին ԿԳՄՍ նախարարին հանդիպել, սակայն մերժումից հետո փորձել էին մուտք գործել նախարարության շենք, ոստիկանները ուժով հեռացրել էին նրանց, ինչից հետո ցուցարարները նստել են նախարարության մուտքի մոտ։

Նշենք նաև, որ 17:50-ի տվյալներով, ոստիկաններն ուժով բերման են ենթարկում ցուցարարներին: