ՀՀ առողջապահության նախարարությունը զիջումների կգնա ծխելու դեմ պայքարի օրենսդրական փաթեթի հարցում. «Իմ քայլը»
Մեզ հաջողվեց որոշակի համաձայնության հասնել Հայաստանի առողջապահության նախարարության հետ մի շարք հարցերի շուրջ, որոնք վերաբերում են ծխելու դեմ պայքարի մասին օրենսդրական փաթեթին։ Այս մասին խորհրդարանի «Տնտեսական հարցերի մշտական հանձնաժողովի նիստում, «ծխախոտի արտադրանքի եւ դրա փոխարինիչների կիրառումից առողջությանը հասցվող վնասի կրճատման եւ կանխման մասին» օրինագծերի փաթեթի եւ հարակից օրենքների քննարկման ընթացքում ասաց հանձաժողովի նախագահ, կառավարող «Իմ քայլը» դաշինքի պատգամավոր Բաբկեն Թունյանը։
Նրա խոսքով՝ Հայաստանի առողջապահության նախարար Արսեն Թորոսյանը համաձայնել է գնալ մի շարք զիջումների եւ, մասնավորապես, հրաժարվել է ծխախոտի բոլոր տեսակների համար ծխախոտի միանման տուփի՝ անկախ դրանց անվանումից եւ արտադրող ընկերությունից, ներդրման մասին կետից։ Բացի այդ, առողջապահության նախարարությունը հրաժարվել է հանրային սննդի վաճառակետերում սիգարետների վաճառքի արգելքի կետից, քանի որ դա, խորհրդարանականների կարծիքով, կարող է հանգեցնել ստվերային շուկայի առաջացման եւ բնակչության շրջանում այսպես կոչվող «ինքնապտտման» տարածմանը, ինչը պակաս վնասակար չէ առողջության համար։ «Մենք նաեւ պայմանավորվել ենք, որ այս օրենսդրական փաթեթից հանվի կիսափակ շինություններում ծխելու արգելքի մասին կետը»,- նշել է Թունյանը։
Պատգամավորը նաեւ ասել է, որ սիգարետների ցուցադրումը սուպերմարքեթների տաղավարներում կարգելվի, բայց, միեւնույն ժամանակ, փոքր առեւտրակետերում նման արգելք չի մտցվի։ Բացի այդ, այդ արգելքը չի տարածվի այն խանութների վրա, որոնք գտնվում են հանրապետական օդանավակայանների տարածքներում։ Բայց սա էլ դեռ ամենը չէ։ Ռեստորանների մուտքերի մոտ կարգելեն ցուցանակները, որոնք ազդարարում են, որ այստեղ ծխել կարելի է։ «Այս ամենից բացի, մենք պայմանավորվել ենք, որ բոլոր այն կետերը, որոնք կհակասեն կամ հետագայում կհակասեն ԵՏՄ տեխնիկական կանոնակարգին, կհանվեն։ Համենայնդեպս, այնքան ժամանակ, քանի դեռ լիովին չի մշակվի եւ տրամաբանական ավարտի չի հասցվի ԵՏՄ տեխկանոնակարգը»,- ասել է հանձնաժողովի նախագահը։