Հիմնադրամը պետք է դառնա իսկապես ներկայացուցչական մարմին և ընդգրկի համահայկական ավելի լայն շրջանակներ. Արման Բաբաջանյան
ԱԺ պատգամավոր Արման Բաբաջանյանը ֆեյսբուքյան իր էջում գրել է. Ժամեր առաջ մեկնարկել է «Հայաստան» համահայկական հիմնադրամի հեռուստամարաթոն – 2019-ը։ Ընդհանրապես «Հայաստան» համահայկական հիմնադրամի հեռուստամարաթոնները պետք է հանդիսանա համազգային նշանակության իրադարձություն: Այդ հեռուստամարաթոններն ու հանգանակությունը պետք է լինեն համահայկական սպասում՝ գրեթե յուրաքանչյուր հայ պետք է սպասի տարվա այդ օրվան, համազգային իր լուման բերելու համար:
Արդյո՞ք հեռուստամարաթոնի և ընդհանրապես համահայկական «Հայաստան» հիմնադրամի, այսպես ասած, մակրոտնտեսական ցուցանիշները, հանգանակությունների վիճակագրությունը արտահայտում է այն պոտենցիալը, որ ունի աշխարհով մեկ սփռված հայությունը՝ 10 միլիոն հայությունը:
Իրատես լինելու պարագայում պետք է արձանագրենք, որ առնվազն 1998 թվականից «Հայաստան» համահայկական հիմնադրամը բավականաչափ հեռացել էր համահայկական իրական ընդգրկումից՝ ավելի շատ դառնալով համահայկական հիասթափության խորհրդանիշ:
Հիասթափություն առաջին հերթին հայկական պետականության որակներից, որի թիվ մեկ պատասխանատուն եղել են այդ պետականության որակները մոտ երկու տասնամյակ շարունակ հետևողականորեն սղոցած իշխանությունները, կիսագողական տնտեսա-քաղաքական համակարգը: Մյուս կողմից ակնհայտ է, որ «Հայաստան» հիմնադրամը չպետք է ասոցացնել այդ համակարգի հետ, Հայաստանը չպետք է ասոցացնել այդ համակարգի հետ, Ղարաբաղը չպետք է ասոցացնել այդ համակարգի հետ:
Հիմնադրամը պետք է դառնա իսկապես ներկայացուցչական մարմին և ընդգրկի համահայկական ավելի լայն շրջանակներ։ Այսպիսով հիմնադրամի հանդեպ վստահությունը անբեկանելիորեն կավելանա՝ իր հետ բերելով նաև հանգանակության ավելացում, և հետևաբար համահայկական հիմնադրամի ծրագրային արդյունավետության և ծավալային, և որակական էական աճ:
Ինքս դեկտեմբեր ամսվա իմ պատգամավորական աշխատավարձի պարգևավճարն եմ նվիրաբերում հիմնադրամին։ Դասակարգելով հեռանկարի հրամայականներն ու ընթացիկ մարտահրավերները կոչ եմ անում ակտիվ մասնակցել համահայկական այս հանգանակությանը։
Լինենք պահանջատեր՝ մասնակցենք և պահանջենք արդյունավետություն, մասնակցենք և պահանջենք հաշվետվողականություն, մասնակցենք և պահանջենք ներկայացուցչականություն՝ հանուն Հայաստանի, հանուն Ղարաբաղի և նաև հանուն Սփյուռքի: