Ֆրանսիայում հնագետները տարօրինակ գերեզմաններ են հայտնաբերել

Պեղումները, որ կատարել են Ֆրանսիայի Կանխարգելիչ հնագիտական հետազոտությունների ազգային ինստիտուտի աշխատակիցները Տուր քաղաքի տարածքում, ավարտվել են մի քանի տասնյակ տարօրինակ գերեզմանների հայտնաբերմամբ։ Հին գերեզմանների որոշ յուրահատկություններ, ինչպես հայտնում է RG-ը, չեն համապատասխանում հուղարկավորության այդ տարածքում տարածված կանոններին։

Ֆրանսիացի հնագետներն աշխատել են այն տարածքում, որտեղ մինչեւ 2013 թիվը տեղակայված են եղել երկաթգծային գնդի զորանոցները։ Այստեղ գիտնականները գտել են երկու գերեզմանոց, որոնցից մեկը շատ սովորական է եղել (դա հազար տարի առաջ հիմնադրված Բոմոն աբբայության գերեզմանոցն է), իսկ ահա երկրորդը ապշեցրել է գիտնականներին իր տարօրինակությամբ։

«Մենք գտել ենք մոտ ութսուն մարմին, որոնք թաղվել են շատ տարօրինակ կերպով։ Որոշ գերեզմաններում կմախքի միայն մի մասն է, մյուսներում՝ կմախքներ առանց գանգերի կամ վնասված գանգերով, որոշներում՝ միայն մի քանի վերջույթներ։ Որոշ գերեզմաններում մի քանի մարդու մնացորդ կա»,- պատմում են հնագետները։

Հին տարօրինակ գերեզմանը հակասում է ավանդական հուղարկավորության պրակտիկային, որը բնորոշ է ֆրանսիական բնակավայրերին։ Գիտնականներն ասում են, որ 1866-1913թթ․ Բոմոն աբբայության տարածքում գոյություն է ունեցել հոսփիս, որին կից աշխատել է բժշկական դպրոց։ Ենթադրվում է, որ ուսանողները սովորել են մահացած պացիենտների մարմինների վրա։