Հայաստանում մարդու իրավունքների պաշտպանի ինստիտուտը մեծ հեղինակություն ունի երկրի ներսում. ՌԴ օմբուդսմեն
Ռուսաստանի Դաշնությունը կօգտվի Հայաստանի փորձից մարդու իրավունքների պաշտպանության հարցում։ Այս մասին Հայաստանի մարդու իրավունքների պաշտպանի ինստիտուտի 15-ամյակին նվիրված համաժողովում նոյեմբերի 26-ին ասաց Ռուսաստանի մարդու իրավունքների լիազոր Տատյանա Մոսկալկովան։
Նրա խոսքով՝ այսօր երեւում է, թե ինչ մեծ հեղինակություն է վայելում մարդու իրավունքների պաշտպանի ինստիտուտը պետության ներսում եւ միջազգային ասպարեզում։ «15 տարում ինստիտուտը դժվարությունների հաղթահարման, ստեղծագործական որոնումների, ձեռք բերված հաջողությունների հսկայական ճանապարհ է անցել, եւ որ գլխավորն է՝ այն կապված է մարդկանց ճակատագրերի հետ, որոնց հաջողվել է օգնել»,- ասել է Մոսկալկովան։
Նրա կարծիքով՝ բանավեճը ազգային իրավապաշտպան հաստատությունների դերի եւ խնդիրների շուրջ ակտուալ է, քանի որ անդրադառնում է յուրաքանչյուր մարդու, ինչպես եւ հենց օմբուդսմենների շահերին։ «Այժմ համաշխարհային խնդիրների ֆոնին առաջ են եկել մարդու իրավունքների նոր մարտահրավերներ եւ սպառնալիքներ՝ հարցի քաղաքականացումը, գլոբալացումը, անտարբերությունը, կյանքի պահպանման համար պատասխանատվության ցածր մակարդակը։ Քիչ տեղերում է, որ տեղական ինքնակառավարման մարմնի կամ իշխանության մարմնի ղեկավարի գնահատականի չափանիշը մարդու իրավունքների պաշտպանվածությունը լինի»,- խոստովանել է Ռուսաստանում մարդու իրավունքների լիազորը։
Մարտահրավերների շարքում նա նշեց նաեւ անլեգալ միգրացիան, հասարակության շերտատումը, դաժանությունը եւ կիբեռսպառնալիքները, ստրկական աշխատանքը, կանանց խտրականությունը կարիերայի աճի հարցում եւ կենցաղային բռնությունից պաշտպանվածության թույլ մակարդակը։
Ինչպես նշեց Տատյանա Մոսկալկովան, շատ կարեւոր է, որպեսզի Հայաստանում ձեւավորվի օմբուդսմենի սահմանադրա-իրավական կարգավիճակ։ Այժմ շատ բան կախված է Մարդու իրավունքների պաշտպանի անձնական բարոյական եւ մասնագիտական հատկանիշներից։
Նա նշեց, որ Հայաստանի օմբուդսմենը արձագանքում է ոչ միայն իշխանության մարմինների, այլեւ ցանկացած իրավաբանական անձի անօրինական որոշումներին, որն անդրադառնում է քաղաքացիների իրավունքներին եւ շահերին սոցիալական ոլորտում՝ լինի կրթություն, բժշկություն, թե առեւտուր։ «Դա, անկասկած, հետաքրքիր փորձ է մեզ համար, որը կփոխառենք»,- ասել է Ռուսաստանի օմբուդսմենը։
Իր ելույթի վերջում նա շնորհակալություն է հայտնել Հայաստանի օմբուդսմեն Արման Թաթոյանին սերտ համագործակցության համար, որը թույլ է տվել օգնել վերականգնելու Ռուսաստանում Հայաստանի քաղաքացիների եւ Հայաստանի տարածքում ռուսաստանցի քաղաքացների խախտված իրավունքները։